Presidente di Venezuela, Nicolás Maduro, lo presenta diabierna e presupuesto nacional na Tribunal Supremo de Justicia (TSJ), e maximo autoridad hudicial den e pais, cu a accede na un peticion di e presidente pa ignora autoridad di Asamblea Nacional como organo constitucional cu ta responsabel pa aproba presupuesto di gobernacion.
Esaki ta ser mira como un atentado directo contra e poder legislativo, pero cu por tin consecuencia grave frente e mercadonan financiero internacional.
Un decision di TSJ publica diaranson pasa, ta establece cu e presupuesto nacional mester ser presenta na e Sala Constitucional di TSJ, bao di e forma normativa di ‘Decreto’ cual lo tin “rango y forsa di ley”. A pesar cu e ta un decision di e instancia hudicial maximo di e pais, e diputadonan opositor ta opina cu e ta contra constitucion y nan a alerta cu si concretisa e procedimento, gobierno lo hay’e cu obstaculo pa contrae debe.
“No tin, ni via estado di excepcion, ni via decreto di emergencia, un posibilidad cu Maduro ta traha su mes presupuesto”, Julio Borges, lider di e bancada di e Mesa de la Unidad Democrática (MUD), a declara.
Di su banda, José Guerra, presidente di e comision di Finanzas di Asamblea Nacional, a haci un yamado di “alerta na e banconan di Venezuela, e banconan den exterior, e banconan di inversion, cu nan lo mester abstene nan mes di otorga financiamento na un gobierno cu ta cometiendo un ilegalidad”.
E tribunal a basa su decision riba “e proposito di mantene e funcionamento di estado, e garantia di e derechonan fundamental y e orden constitucional”. TSJ, cu e Unidad ta acusa di ta na servicio di e gobierno socialista, a blokia tur iniciativa di Parlamento, domina desde januari pa oposicion y pa prome biaha den 17 aña di hegemonia chavista, loke a hinca e pais den un profundo crisis institucional.
Efecto riba mercado
“Mi ta kere cu esaki ta haci un daño masha grandi na e pais. Lo tabata miho si e gobierno a hiba e ley di presupuesto y ley di endeudamiento pa Parlamento, y nos lo a haci e modificacionnan pertinente y nos lo a aproba nan”, Guerra a bisa.
Asina lo a evita “loke lamentablemente lo bay pasa na 2017 y esey ta cu ta bay tranca e financiamento interno y externo, pasobra ningun hende no ta bay cumpra un bono di e debe publico nacional si e no ta den e ley di endeudamiento cu mester ta aproba pa Asamblea”, el a añadi.
E decision di e tribunal “ta perhudica e facultadnan di e Asamblea Nacional y ta genera cada bes mas desconfiansa den Venezuela”, e analista economico Jesús Casique ta considera.
“E lo ta mal mira pa e mercadonan y ta bay afecta e nivel di riesgo di pais Venezuela, cu ta un di esunnan mas halto di mundo”, Casique ta apunta.
Venezuela, cu e reservanan di petroleo mas grandi di mundo, ta pasando den un crisis economico y social, cu un inflacion anual calcula pa Fondo Monetario Internacional na 475% y un contraccion di su Producto Interno Bruto di 10% pa e aña aki.
Desde december 2014 Banco Central di Venezuela a stop di publica di manera regular datonan economico principal. E ultimo cifranan di 2015 a keda divulga na januari ultimo. Riba e punto aki, Casique a cuestiona cu por elabora un proyecto di presupuesto pa 2017 si ainda Banco Central no a divulga e cifranan di 2016.
“Ta trata di presupuesto cu ta carece di base tecnico. Na 2016, e calculo di e Producto Interno Bruto a keda na blanco. Esakinan ta presupuesto politico, no presupuesto economico”, el a sigura. Y den e mesun tono, Guerra a critica cu TSJ, “cu no ta faculta pa esey, cu no tin nocion di finanzas publico, ta aproba un presupuesto nacional”.
