Gobierno ta encamina dos proceso pa medio di dos Request For Expresion Of Interest (REOI), cu dialuna ultimo a cuminsa simultaneo pa determina cual lo bira e miho opcion pa refineria di Aruba. Pero esaki no ta inclui e operacion di e terminal di combustibel, asina prome minister Evelyn Wever-Croes a contesta na Bon Dia Aruba.
Nan ta dos proceso cu ta wordo desaroya pareu: REOI 1 y REOI 2. E prome lo determina si lo tin interesado pa expresa nan interes pa reapertura di refineria. Pero tambe nan ta busca industrianan relaciona cu refineria y energia. Pa loke ta e REOI 2, nan ta pidi tur interesado pa expresa nan interes riba cualkier otro tipo di desaroyo cu por genera empleo y desaroyo economico similar na e refineria.
Den pasado gobierno a yega di expresa e potencial cu e terminal di combustibel tin pa genera entrada den caha di gobierno. Minister Presidente Wever-Croes a bisa cu e terminal si ta nan deseo pa ‘tene den nan propio man’. E posibilidad di mantene e terminal sea cu gobierno pa medio di Refineria di Aruba (RDA). Of e no ta descarta e posibilidad di lease e terminal aki na un otro partido.
Gobierno no kier pone tur webo den e mesun macutu. El a laga sa cu e terminal no ta hinca den e procedura di e dos REOI cu tur cos ta bay den man di esun cu ta gana e bid. E ta haya cu si gobierno por keda mantene e terminal di combustibel, nan por wak otro desaroyo den un bon man, independiente di e refineria. E decision aki ta garantisa si acaso un opcion bay malo, e otro si gobierno por depende riba dje.
Igualmente tur cos ta depende di e desaroyo cu e dos REOI lo mustra na momento cu gobierno lo tuma un decision definitivo riba refineria su futuro. E mandatario no ta nenga cu na caminda por bin cambio riba maneho di e terminal di combustibel.
“Si ta algo cu nos por bisa, esaki ta un oferta cu nos no por nenga, pasobra e ta asina bon pa Aruba, nos por consider’e,” esaki tabata palabra di premier Wever-Croes.
