Pa medio di anuncio di dos REOI pareu: Gobierno a inicia proceso pa determina refineria su futuro

Ayera gobierno a inicia cu e proceso pa busca un operador nobo pa e refineria. Of un inversionista cu kier haci otro sorto di inversion.

Pa encamina e proceso pareu aki, gobierno a bin cu dos Request For Expresion Of Interest (REOI). Cada un di nan ta expresa e pensamento di e partidonan cu ta forma parti di e coalicion. Di un banda, esun cu ainda ta pusta riba existencia di refineria riba nos isla. E otro tendencia ta esun cu ta pensa cu mester bin cu otro tipo di desaroyo economico den e area aki.

Prome Minister, Evelyn Wever-Croes a bisa cu e anuncia aki pa start e proceso di REOI ta uno hopi importante, ya cu for di ayera el a wordo publica. Gobierno a bin cu e notificacion publico riba diferente website den diferente idioma, specialmente Ingles, ya cu nan kier yega na comunidad internacional. Pero tambe e notificacion publico aki lo wordo publica den corant local y internacional.

Nan ta dos proceso cu ta wordo desaroya pareu: REOI 1 y REOI 2. Riba e number 1 nan ta pidi tur interesado pa expresa nan interes pa reapertura di refineria. Pero tambe nan ta busca industrianan relaciona cu refineria y energia.

Pa loke ta e REOI 2, nan ta pidi tur interesado pa expresa nan interes riba cualkier otro tipo di desaroyo cu por genera empleo y desaroyo economico similar na e refineria. Nan tin tres proyecto canando den dos procedura. E mandatario a bisa cu nan a bin cu e dos procedura diferente aki, argumentando aspecto relaciona cu naturalesa. Ademas exigencia di cada un ta diferente.

Den e notificacion publico gobierno a stipula algun exigencia. No solamente nan mester genera cupo di empleo y desaroyo economico, sino tambe nan mester cumpli cu reglanan ambiental. Otro condicion tin di haci cu e actividad mester por cumpli cu e maneho di reino riba tereno di relacion exterior y tambe riba e maneho di OFAC (Office of Foreign Assets Control) di Merca. Segun Wever-Croes, gobierno kier evita bolbe cay of no den e tipo di discusion di sancion di Merca riba Venezuela.

E fecha pa entrega tur oferta lo keda vigente den un periodo relativamente cortico, te 17 di juli. Tur interesado tin seis siman kiermen un luna y mey, pa nan por reacciona y entrega nan oferta. E entrega mester tuma luga cerca un notario kende lo ta encarga cu e proceso aki den forma confidencial, te e momento di e deadline .

E expectativa ta cu esunnan cu den pasado a mustra nan interes -manera gobierno a yega di informa- ainda nan interes por keda vigente, a pesar di e crisis actual produci mundialmente pa e Covid-19. Nan kier scoge e miho opcion pa Aruba, minister presidente a bisa.