Contribucion na pension di politiconan no ta cubri ni un aña

Nos a haci pregunta na Promer Ministro siman pasa durante rueda di prensa, si e parti cu mester reserva pa por paga e pension di un mandatario despues, calcula na 200.000 florin pa aña, ta parti di e ‘Wever-Croes norm’ tambe. Cu esey e suma total lo ta Afl. 380.000,- pa aña, loke aparentemente e NVnan di gobierno ta usa como base. E contesta tabata negativo, e ta bisa cu ta solamente e salario y otro beneficio ta parti di e norma.

Sin embargo segun fuente bon informa gobierno semper lo ta haciendo reservacion pa por paga e pensionnan aki ora yega e momento, y e empresanan estatal tambe.

Bon Dia Aruba a laga un experto financiero calcula kico ta e efecto financiero berdadero di e pension cu un funcionario politico a base di su salario como ministro. Esaki a base di e stipulacionnan di ‘Landsverordening Voorzieningen gewezen politieke ambtsdragers en hun nabestaanden’ (AB 2010 no. 91).

E pension ta ser paga parcialmente di e suma di 8% di e salario di e ministro (Afl. 15.010 pa luna) cu ta retene durante su funcionamento. Pa bin na remarke pa esaki e ministro mester a funciona por lo menos ‘en total’ pa un periodo di ocho luna, pues cu no mester ta un solo periodo continuo. Ademas e lo mester a yega na e edad di pension di awor 65 aña. Sin embargo, pa haya e pension completo di 70% di e salario promedio durante cu e tabata funciona como tal, o di e promedio di ultimo 8 aña si el a sirbi mas tempo como politico/ministro. Despues di ocho aña completa e ministro/politico no mester contribui mas.

E calculacion cu e experto a haci, ta mustra cu e gastonan di un aña relaciona cu e pagonan cu mester haci pa e ‘uitkering bij wijze van pensioen’ na e ex-mandatario (y na su herederonan), cu mester financia a base di ocho aña completo (96 luna) ta mas cu 100% di e suma na salario anual (12 x Afl. 15.010,- = Afl. 180.120,-). Nos ta duna un resumen mas detaya pa nos por mira cuanto placa ta envolvi cu e pension di ministro/mandatario.

E ministro cu sinta en total por lo menos 8 aña completo, na e salario actual, lo a contribui na e fondonan 8×8% di Afl. 15.010,-= Afl. 115.276,80. Pa mas facilidad nos no ta conta e otro beneficio manera vakante-uitkering den e calculo aki. Si e haya un pension a base di ocho aña cu el a cobra Afl.15.010 como salario mensual, e ta haya e maximo di Afl. 10.507,- pa luna como pension, cu ta 70% di e salario di Afl. 15.010,- pa luna. Pa aña e ta haya Afl. 126.810,- loke ta mas cu el a paga den su bida. E resto di añanan cu e pensionado ex-mandatario ta biba, cu por ta mas di 20 aña, nos ta paga, sin cu e mes ta contribui un cent preto mas. Ademas, e mandatario ta haya un ‘overbruggingstoelage’ ora e baha, cu ta practicamente e suma anual cu a reserva den 8 aña. Pues por bisa tambe cu e pension ta completamente gratis.

Asina por bisa cu e Afl. 2.305.536,- cu e ta costa comunidad ta bin directamente di caha di gobierno. Si nos tin, teoricamente, ocho ministro cu bay 8 aña y bay cu pension, nan ta costa nos den 20 aña 8x Afl. 2.305.536= Afl. 18.444.288, casi 18 miyon y mey. Nos no ta papiando ainda di e 21 parlamentarionan, cu ta gana menos, pero tin (casi) e mesun areglo pa loke ta e pension.

Naturalmente tin cu bisa cu en general ningun funcionario publico ta paga su so pa su pension. Un parti grandi ta bin tambe di e mesun caha di gobierno. Loke si ta berdad ta cu e ambtenaar comun y coriente ta paga hopi mas durante 35 aña pa e yega na un pension di 70% di su salario promedio.

En vista di e privilegionan grandi cu e politiconan ta acumula den poco tempo, no ta nada straño cu Hulanda no a pone como exigencia corta 20% di salario y beneficio so, sino tambe a stipula cu esey ta ‘te proximo aviso’ y no te fin di e aña aki.