Ayera mainta y despues di casi tres luna, finalmente miembronan di prensa por a atende personalmente un conferencia di gobierno, cumpliendo cu tur rekisito di salubridad contra Covid-19, caminda Prome Minister, Evelyn Wever-Croes a bisa cu esaki ta refleha cu poco poco nos ta cuminsa custumbra cu e normal nobo.

E motibo di e conferencia tabata e anuncio di gobierno pa bin cu dos proceso di Request For Expresion Of Interest (REOI) cu lo determina e futuro di refineria. Sinembargo e desaroyo politico actual a pone cu e topico riba stabilidad di gabinete Wever-Croes a haya atencion di prensa. Esta despues cu lider di POR a pidi pa e minister di nan partido, Marisol Lopez-Tromp, entrega su cartera mas tarda ayera prome cu 10or di mainta. Esaki a haci cu prensa a pone extra atencion riba e topico aki.

Na inicio di e conferencia, e prome mandatario a haci un comentario riba e desaroyo politico di nos pais. El a cualifica como un ‘desunion y desacuerdo’, interno den partido POR cu ta un partner den coalicion. El a haci un apelacion riba e partido aki pa nan por atende den un forma interno, amical y den tur integridad, nan diferencia cu Lopez-Tromp y vice versa. E ta kere cu gobernacion ta ‘algo serio y problemanan di cas, mester wordo atende na cas’. E ta purba di compronde e motibonan pa bin cu un decision asina. Sinembargo e ta mira cu basicamente hopi di nan tin di haci cu e area di comunicacion, di con ta trata un cu otro.

Den fin di siman, el a urgi ambos partido, tanto partido POR como minister Lopez-Tromp, pa nan dialoga cu otro y demostra madurez pa logra finalmente un solucion, mirando e situacion actual cu pais Aruba ta aden. “Aruba ta den un crisis aworaki. Y nos mester tur atencion pa nos por bringa e crisis aki,” el a bisa. El a remarca cu nos tin diferente preocupacion, entre nan social, economico, financiero y laboral cu ta biba den comunidad, y nan mester haya atencion. E ta spera cu integridad general di Aruba sa di prevalece riba tur otro interes.

E mandatario a duna mas informacion a base di preguntanan di prensa riba e situacion politico actual y stabilidad di gobierno. Bon Dia Aruba a puntr’e riba e opcion di un landsbesluit cu su persona lo por entrega na Gobernador di Aruba pa retira Lopez-Tromp for di su gabinete, den caso cu e mes no ta tuma honor di entrega su renuncia, manera ya caba el a yega di anuncia. “Pa contesta bo pregunta, mi no tin niun decreto traha. Mi no tin pensa di haci’e tampoco.”

Tur cos ta mustra cu si Lopez-Tromp no ta entrega su renuncia, manera lider di POR a pidi’e pa medio di un carta, constitucionalmente e proceso aki lo wordo encamina pa medio di un mocion di desconfiansa entrega den parlamento. Un decision cu eventualmente lo ta den man di fraccion di POR.

Premier Wever-Croes a bisa cu no ta den su plan of intencion pa haci algo asina. Tampoco e no sa si constitucionalmente esey ta e caminda pa bay. Pero el a yega di papia caba cu ambos partido y el a pidi nan pa dialoga y yega na un solucion, awor cu Aruba ta pasando den un crisis. “No ta husto cu meymey di tur e crisis aki ta coy e problema aki y tira den scochi di otro,” el a bisa.

Minister presidente a laga sa cu su interes actualmente ta ‘stabilidad di gobierno y trankilidad den comunidad’. Ya cu nan mester delibera riba con pa crea cupo di empleo. Tambe e dilema di habri e frontera of no y e condicionnan pa habrie. Igualmente desaroyo di nos economia. P’esey el a pidi ambos partido pa atende cu nan diferencia mas lihe cu ta posibel.

E lo sigui den contacto cu e lider actual di POR, minister Andin Bikker y tambe cu e miembro di su gabinete, minister Lopez-Tromp. A pesar cu e ta un asunto cu ta competencia di nan partido internamente, minister presidente ta haya cu esaki ta un desaroyo cu nan mester sigui monitor cada rato, ya cu e ta algo cu por cambia.

Encuanto si situacion actual ta duna espacio pa un eleccion pronto, premier Wever-Croes a declara cu teoricamente na momento cu un gobierno ta perde sosten di un mayoria den parlamento, e ta crea espacio pa un eleccion. Sinembargo e no ta kere cu ta bon pa Aruba aworaki.

E ta haya cu un campaña electoral memey di e crisis cu nos ta aden, no ta sirbi na interes general di Aruba, ni e ciudadanonan di nos pais. “Pues si por evita esey, lo evita esey,” el a declara. E ta reconoce cu e situacion aki ta un consecuencia ora un gobierno tin un coalicion cu no ta wordo sosteni ampliamente. “E ta e realidad cu nos ta biba cune,” segun e prome mandatario.