Weekend ultimo, epidemiologo di Corsou, Izzy Gerstenbluth a tene un sesion di informacion tocante reapertura di frontera, enfatisando cu maske a habri frontera cu islanan BES, no ta habri frontera cu Aruba.

Segun informacion publica den varios relato di e portal Curasoleño, VigilanteKorsou, Corsou lo habri su frontera dia 1 di juli proximo, permitiendo turismo di Hulanda sin cuarentena, a pesar cu Hulanda ainda tin caso activo di COVID-19. Tambe a habri frontera pa Alemania y Belgica.

Strategia di e ruman isla ta pa permiti 10mil turista den e prome luna, y evalua con esey ta bay. Mercado ta keda cera pa Merca, Brazil y Colombia, como tambe Aruba y Sint Maarten.

Segun Vigilante, pueblo di Corsou den su mayoria no ta di acuerdo pa permiti turista drenta, mucho menos sin cuarentena. Minister Steven Martina a splica publicamente cu no ta di acuerdo pa pone turistanan cu yega Corsou pasa den cuarentena, principalmente no esunnan di Hulanda.

Mientras tanto, Copa Airlines, Air Canada y American Airlines cuminsando na juli, mientras Avianca lo cuminsa bula pa Corsou na september.

Na Aruba, gobierno keto bay ta evaluando opcionnan pa reapertura di frontera. A menciona varios biaha e fecha tentativo di 15 di juni, pero tambe a specifica cu por keda atrasa te na 1 di juli. Esaki a pesar cu Aruba tin un luna caba sin caso nobo di COVID-19.

Manera Bon Dia Aruba a reporta, prome minister Evelyn Wever-Croes a declara cu a ricibi conseho di outbreak management team di RIVM tocante reapertura di frontera. Ya caba Aruba ta cumpli cu ‘mayoria’ di e rekisitonan pa por habri frontera, y esunnan cu falta, gobierno ta preparando pa asina por cumpli cu tur. Esaki pasobra ta purbando di minimalisa e riesgo na momento di habri frontera bek. Wever-Croes a splica cu elimina riesgo no ta algo cu ta den lenguahe di covid-19, pero cu ta haci tur lo posibel pa minimisa esaki.

Mientras tanto, riba website di aeropuerto Reina Beatrix por mira cu varios aerolinea tin vuelonan programa pa fin di juni y cuminsamento di juli. Delta Airlines, Jet Blue, KLM, TUI, Aruba Airlines, Divi Divi Air, EZAir y Winair tur tin vuelonan programa pa bin Aruba den luna di juni.