Diahuebs ultimo un delegacion di Asociacion Arubano di Prensa, a sinta na mesa cu un delegacion di Cuerpo Policial Aruba, encabesa pa Altocomisario interino Vanessa Kock. E reunion aki tabatin como meta pa crea un miho forma di traha entre e dos entidadnan aki.
Presidente di ASAP, Miriam “Mimi” Koolman-Rosel a expresa su satisfaccion cu resultado di e reunion aki cu na final ta sirbi e meta comun cu ambos grupo tin, esta Aruba. A delibera riba varios punto pa yega na un miho relacion di trabou, tanto di e Polis como e miembro di Prensa. E intencion ta pa yega na un convenio den cual ta stipula e puntonan di respet pa ambos banda y cu, segun Mimi Koolman, lo beneficia e miembronan di ASAP y Prensa en general.
Ta tuma Hulanda como ehempel den esaki, den cual e Cuerpo di Polis Hulandes a yega na acuerdo cu NVJ, e asociacion di prensa di Hulanda, pa otorgamento di carnetnan pa Prensa, acredita door di Polis. Ey ambos organisacion ta acorda adelanta, kico ta e reglanan di wega, den cual ambos tin cu tene nan mes na dje, pa esun no stroba trabou di e otro. Esaki sin duda lo evita mal comprendemento na sitionan di suceso.
Den pasado tabatin un convenio asina entre Polis y Prensa, pero cu añanan, cu entrada di generacion nobo den Polis y den Prensa, a causa cu poco poco a lubida e convenio. Di otro banda, temponan a cambia y awor ta cla pa cera un acuerdo nobo na e circunstancianan di awendia.
Altocomisario Interino Vanessa Tjon-Kock di su banda a elogia e reunion y cu el a haya e encuentro un bon oportunidad pa yega na acuerdo cu e Asociacion Arubiano di Prensa. “Nan a bini cu diferente proposicion y ta yega momento cu cada un mester respeta trabou di otro. Esaki ta algo cu nos a purba palabra, pero lo tin mas reunion pa sigui riba e tema aki,” el a bisa.
Pronto lo reuni un biaha mas pa sigui traha riba e concepto di e convenio.
.
