Problema den POR… Por resulta den eleccion…?

E fin di siman aki no tabatin mayor noticia mas tocante e incidente cu ta obheto di discusion tur caminda. Nos no sa ainda kico ta bay pasa pero en todo caso mester ta obvio cu e atencion no ta solamente na Aruba. Nos a logra capta atencion di Den Haag atrobe, y atrobe no den forma positivo. Nos ta dunando muestra atrobe cu, mientras nos ta grita den tur asunto cu Hulanda mester ‘back off’, nos ta duna muestra di cu nos mes ‘no por’?

Nos ta apenas sobreviviendo den e peor crisis cu e yega di dal nos, anto un partido minusculo ta trata di ‘hijack’ henter e pais aki. Si nos limita nos mes pa critica nan pa nan actitud y mal sentido di huicio, nos no ta logra yega na e nucleo di e asunto. No ta suficiente pa bisa cu e partido ta rabia cu e ministro pa un par di cos cu el a haci otro cu nan a kere cu ta corecto. Manera e decision pa bay pidi ‘surseance van betaling’. Facilmente e ministro ta bisa cu ta algo cu e Hunta di Supervision mester dicidi. Esey ta parce corecto, pero den cuanto caso no ta asina cu un mandatario ta ignora e supuesto independencia o autonomia di un empresa estatal y ta bisa e hunta di supervision exactamente kico e kier y con e kier pa haci esey? Di repente nan ta riba nan mes? No cu nos a ripara. Nos ta papiando aki di un empresa estatal pa cual gobierno te awe no por a regla un forma eficaz pa cobra na clientenan, loke te awe tambe ta e problema cu e placa mester bin di otro banda, for di gobierno mes anto.

Pero e asunto ta parce mas serio cu un pleito tocante maneho. For di bon fuente nos a haya informacion cu e situacion na Serlimar ta dramatico, y cu el a bira especialmente dramatico den ultimo dos aña, bao maneho di e predecesor di e actual ministro. Ta logico pa pensa cu entre un ministro saliente y uno entrante di mesun partido lo tabatin cierto palabracion. Tambe y hasta den cosnan menos bunita cu nos no mester haya sa. Al fin y al cabo, ningun di dos ta conoci como santo; nan tur dos tabata den politica pa hopi aña den cual hopi cos menos bon a sucede. Sin embargo, esaki ta otro asunto, unda un empresa estatal ta na peligro di bancarota… y nos ta tende solamente silencio… Ningun comentario di parti di gobierno den su totalidad, mientras cu den pasado, pa añanan largo, tur aña tabata tende e mesun storia cu ‘mester pone tanto miyon florin riba mesa pa salba Serlimar’. Na december pasa ainda mester a pone un suma miyonario riba mesa pa Serlimar por a cera aña ‘mas o menos’. Di repente no ta importante mas pa dedica atencion na e caso aki? A tuma e decision caba cu no ta bay haci nada? O tin algo mas ta hungando un papel? Al fin y al cabo, recoge sushi ta un tarea publico cu te awe gobierno tabata asumi e gastonan. Si no tin Serlimar mas, anto keto bay ta existi e tarea publico cu gobierno mester asumi.

Sin embargo, hasta esaki ainda no ta tur cos. Tin indicacion di asunto cu ta requeri investigacion mas profundo, inclusive investigacion penal. Si esey ta e caso anto e ta pone e accion di e partido aki den un otro luz. Y cu un ministro ta ser yama cerca Gobernador y ta sinta tanto den su oficina, ta un señal cu e asunto aki ta birando algo ‘mas grandi cu nos’ atrobe. Riba su mes e Promer Ministro por tuma e decision pa scapa e gabinete sacrificando e ministro aki. E ta bay Gobernador cu un landbesluit cu el a firma caba y si Gobernador tambe firma, e retiro ta un hecho. Sin embargo, retira un ministro cu ta den e proceso di (laga) haci un investigacion di e indole aki, ta tira un mancha riba tur esnan cu ta boga pa e bay. Y ademas lo no mustra bon si ta tolera cu e partido colega ta propone un ministro nobo cu ta bay trata di para e investigacion, pasobra esey lo no ta conveniente pa e ministro anterior. Esey lo caba cu tur pretension di ‘bon gobernacion’ cu e gabinete por tin.

Ta keda e opcion di bisa no na e exigencia di e partido pa retira nan ministro, y enfrenta seguidamente e posibilidad di cu e partido ey ta ‘pull the plug’. Lo mas probable ta cu lo bay eleccion den e caso ey, loke por bira fin di october. Ningun hende no ta mira necesidad pa esey, pero tin un posibilidad cu nos ta bay den e direccion ey. Ningun di e bandanan envolvi tin hopi tempo mas pa pensa kico nan ta haci. Ta casi sigur cu e ministro concerni no ta entrega su retiro, y palabra lo ta na e partido exigente. Ningun opcion ta mustra bon pa nan pasobra den un eventual eleccion nan ta esun cu mas di perde di tur partido politico. Y guli orguyo tampoco lo tabata e meta ora a cuminsa e campaña aki.