Durante un conferencia di prensa di diabierna ultimo, gobierno di Aruba a invita Dr. Joaquin van Trigt di HAVA pa trece dilanti un actualisacion medico di loke ta trata siguridad di muchanan den scol pa cu e virus cu ta causa Covid-19.

El a splica cu e ponencia cu el a presenta algun dia pasa a haya un actualisacion nobo cu recien a sali di un investigacion publica 3 di juni ultimo riba e website Nederlands Tijdschrift voor Geneeskunde (NTvG), cu ta duna un miho splicacion di e rol di muchanan den e transmision di Covid-19. Asina tambe ta como identifica cu datonan si muchanan ta hunga un rol importante den e transmision di e virus pa otro mucha.

Aruba no a presenta casonan positivo pa muchanan entre 0 pa 3 aña di edad, compara cu Hulanda cu te dia 11 di mei tabatin 74 pashent, di 4 pa 11 aña na Aruba tabatin 3 pashent y Hulanda 38, di 12 pa 18 aña di edad Aruba tabatin 4 pashent y Hulanda a registra 257.

Tambe, Van Trigt a informa cu e investigacion aki a wordo haci cu 54 famia cu un total di 227 participante, unda por a mira e prome pashent cu a bira positivo (Indexpatient) y tur hende cu a haya contacto cune y e malesa pa via di e pashent aki.

Van Trigt a bisa cu e conclusion di esaki ta cu mayoria di biaha e indexpatient ta contagia hendenan di su mesun edad of hendenan mas grandi y cu e pashent aki casi nunca ta un mucha pero si por contagia un mucha, pa loke el a confirma cu ‘muchanan casi no ta transmiti virus pa otro, pero adulto si por transmiti pa mucha’.

E investigacion a conclui cu muchanan no ta hunga un rol importante den e transmision di e virus Covid-19. Esaki ta sucede principalmente entre adultonan y famia adulto pa muchanan. E transmision entre muchanan of di muchanan pa adulto ta parce menos comun.

Sinembargo, na hopi pais incluyendo Hulanda a dicidi di cera scolnan como un medida pa combati e pandemia. Despues cu a tuma e decision cu muchanan mester bay bek na scol, ayera 7 di juni precisamente na Israel e regreso pa scolnan a bira complica, despues cu mas di 16.000 alumno y profesor ta den cuarentena, un centenar di scol a cera y a localisa 360 caso positivo desde cu a tuma e decision di habri scolnan.

E 16.000 alumno y empleadonan di centronan educativo ta obliga di permanece dos siman na cas pa evita e propagacion di e virus. Den total ta 110 scolnan cera desde cu a permiti su reapertura di forma gradual na comienso di luna di mei.

Tambe, na Den Haag tin 500 alumno den cuarentena, 3 docente contagia cu Covid-19 y scolnan a cera te ora cu por haya e resultado di tur di nan. Di esaki Bon Dia Aruba a puntra Van Trigt segun e datonan cu el a mustra cu muchanan ta sigur na scol, no ta supone cu tur e dato tabata mustra cu e situacion tabata sigur pa habri scol eynan tambe?

Van Trigt a sigura: “Mi ta kere cu ta bon pa ta sigur pa tuma e medidanan necesario te ora ta sigur con e contagio di e manera aki a tuma luga. Ta berdad cu algun scol a cera bek rond di mundo door di contagio di Covid-19. Pero te awor e contagio a tuma luga pafo di scol, loke ta nifica cu un maestra of personal di scol a haya e virus pafo y el a trece na scol, no cu el a wordo contagia den scol mes. Esey ta locual mi a compronde di tur e caso cu scolnan a wordo cera.”