Otro siman Stichting Reclassering lo lansa su campaña den cuadro di su 55 aña di existencia. Vice-presidente di e fundacion aki, Sandra Brown a destaca e trabou cu e fundacion aki ta bin haciendo pa scapa nos hubentud for di gara di delincuencia. Siguramente cu aworaki tur hende ta preocupa cu e situacion di criminalidad riba nos isla.
E fundacion no ta yuda solamente e hobennan cu a cay cera, sino hendenan adulto cu a haya problema cu husticia pa nan socialisa bek na nos comunidad. Tambe ora cu un ser femenino ta cay cera e fundacion aki t’ey pa duna e sosten na e famia. Cu esaki e fundacion ta purba di contribui na hisa siguridad y e bienestar di nos comunidad Arubano, pa medio di rehabilitacion y re integracion di e gruponan aki.
Retonan y proyectonan
Durante nan añanan di existencia nan a confronta hopi reto, pero tambe nan tin e animo pa sigui cu nan trabou. “Pasobra si nos no ta duna un man, ken t’ey pa personanan cu ta cay cera”, sra. Brown ta bisa. E ta agrega cu awendia nos ta papia di siguridad den pueblo tur dia. “Pero ta aki nan na Reclassering, nos ta yuda y sinta combersa cu e personanan aki pa e actonan aki stop.”
Nan tin varios proyecto pa atende entre otro cu delincuencia hubenil, drop out escolar, problema di gang y hobennan den riesgo continuamente. Pa atende cu e problematica aki nan a bin cu e proyecto Trayecto di Siña y Traha (LWT), caminda e hoben banda di bay scol ta haya tambe e oportunidad pa siña un ofishi pa despues nan por logra haya un trabou.
Otro problema cu ta asota nos comunidad tin di haber cu e hobennan cu a cay den delincuencia hortando den casnan di hende. Pa nan Reclassering ta percura pa duna nan guia individual y den grupo, unda nan ta purba di conscientisa e hobennan aki riba pakico nan ta haciendo daño no solamente na otro sino na nan mes, na nan mayornan y na e comunidad. E ta bisa cu e proyecto aki ta dunando bon resultado positivo ya cu despues di un par di siman, e mesun hoben ta bin realisa cu ta su pais, ta su famia y e mes ta stroba di bay dilanti.
Falta di fondo
Pa realisa e tipo di proyectonan aki nan mester di financiamento, ya cu e falta di fondo ta otro reto cu e fundacion aki tin pa trata di e reintegra e hobennan problematico den nos comunidad. “Pasobra nada ta cay for di shelo.”
Stichting Reclassering ta un fundacion independiente. Ministerio di Husticia ta financia nan gastonan operacional. Pero pa realisa programanan y proyectonan nan mester haci un apelacion riba generosidad di individuonan, gruponan/clubs y empresanan. Sin e tipo di ayudo aki, nan lo no por continua cu nan trabou den prevencion di criminalidad riba nos isla. Ya cu nan meta ta pa desaroya y mantene e siguridad general por medio di programanan, y proyectonan pa cu e hobennan, pasobra castigo so no ta yuda.
Dos proyecto nobo: droga y gang
Nan kier bin cu dos proyectonan otro aña pa conscientisa riba abuso di consumo di droga y problema di gang. Pa atende cu consumo di droga cerca nos hobennan problematico, nan kier bin cu un programa den grupo ambulante di tres luna. Un 80 pa 90% di hobennan cu ta haya nan mes den problema cu husticia ta uza of ta adicto na marihuana.
Marihuana ta wordo uza bou di e hobennan como un medio pa trankilisa/relax, baha nervio. Den e programa den grupo lo enfoca pa duna e hobennan otro tools pa por trankilisa, sin marihuana y tambe haci nan consciente di e consecuencia a termino largo.
Pa atende cu e asunto di gang nan kier bin cu e proyecto di supervision electronico pa medio di un banchi cu ta monitor unda e hoben ta; of unda e ta bay pa e caminda cana bon durante e periodo di rehabilitacion. Reclassering kier bin cu un proyecto piloto chikito di 6 luna pa wak si algo asina lo traha aki na Aruba.
E meta ta pa pone restriccion den movecionnan di e hoben, y tambe yuda e hoben den su ambiente familiar mes. Esaki por tackle e problema di gang, pero tambe baha e consecuencianan negativo di un detencion den KIA.
Responsabilidad y compromiso social
“Nos ta un fundacion y ta nos tarea pa nos busca e fondonan pa nos completa e proyectonan aki”, asina Sra. Brown ta bisa.
Pa realisa y expande nan proyectonan pa hobennan, Reclassering ta haci un yamada den cuadro di su 55 aña di existencia, na tur organisacion pa apoya nan esfuersonan: nan por bira un sponsor y haci un donacion. Esaki lo yuda e fundacion den nan meta pa reduci e cantidad di hobennan cu a cay den problema cu husticia, y pa desaroya y mantene e siguridad publico.
Siman di reclassering
Den nan ‘Siman di reclassering’ cu anualmente ta tuma luga dia 17 te cu 21 di October, nan lo bin cu nan campaña di ‘double up 55’. Ta asina cu e fundacion aki ta celebra 55 aña y ta spera di ofrece 10 aña mas di servicio ainda mas miho. “Comerciantenan nos ta bin pa bati na boso portanan. Comerciantenan sostene nos por fabor”, asina vice-presidente di Reclassering a bisa.
Nan ta apela na tur sponsor y companianan pa haci un donacion di un suma di 110 florin. Comerciantenan por contribui cu mas si por. Tambe hendenan individual di nos comunidad lo por contribui cu un suma di 55 florin cu ta un number simbolico den cuadro di nan aniversario.
“Asina nos ta pone cu esun cu tin un cartera chikito cu kier mira siguridad den pais Aruba, y den bo bario, bo por aporta na proyectonan valioso cu hoben por siña y wordo kita for di caminda robes cu ta haciendo.”
Tur ta envolvi
Nan obhetivo ta pa recauda 100.000 florin pa december 2016, cu e meta pa cuminsa 2017 cu proyectonan nobo entrante otro aña. Di e forma aki danki na e compromiso di e sector comercial y di nos comunidad en general, Reclassering no ta conta solamente bou sosten di gobierno.
“Nos tambe kier pa tur hende sinti cu nan tambe ta envolvi pa combati criminalidad”, sra. Sandra Brown ta expresa. Y muy particularmente pa comunidad yuda den e proceso di rehabilitacion di e hobennan y adultonan cu problema cu husticia na Aruba.
