Despues di un conferencia di prensa di partido POR, cual a causa masha polemica mirando cu a declara cu tin desconfiansa den nan propio minister, Marisol Lopez-Tromp, prome minister Evelyn-Wever Croes a duna un comentario cortico al respecto.
“Den nomber di gobierno di Aruba, mi por bisa cu esaki ta un asunto interno di partido POR, y mi a pidi nan pa atende esaki internamente, na forma respetuoso y amicalmente”, Wever-Croes a declara. “Aruba ta den un crisis hopi serio aworaki, y mester di atencion di nos tur. Aruba mester un gobierno stabiel pa por atende cu e crisis.”
El a destaca sinembargo cu e problema den partido POR no lo afecta gobierno, sinembargo, el a reitera cu na e momentonan aki, Aruba mester di un gobierno stabiel y di trankilidad pa por maneha e crisis y e fasenan di reapertura di actividad economico. “E discusionnan interno aki den partido POR no ta afecta stabilidad di gobierno, nan ta asuntonan interno di partido POR. Pero na e momentonan aki nos mester di trankilidad pa nos por atende cu tur e crisis cu tin na Aruba awor.”
