Ayera hopi tabata e comentario riba con stabiel gobierno di coalicion (MEP-POR-RED) ta, despues cu a wordo conoci cu den nomber di POR, lider nobo di partido y minister actual di gabinete Wever-Croes, Andin Bikker a pidi renuncia di minister Marisol Lopez-Tromp.
E prome cu a bin cu un declaracion cortico riba situacion interno di gabinete actual tabata prome minister, Evelyn Wever-Croes, kende a trece dilanti cu situacion di partido POR no ta afecta stabilidad politico di gobierno.
Na final di un reunion di conseho di minister y probechando cu minister Rudy Lampe (RED) a bay lunch, prensa a puntr’e riba situacion di gobierno, si e ta tambalia si of no. Lampe a bisa cu absoluto trankilidad cu e gobierno di coalicion ta stabiel. Tambe el a laga sa cu di parti di partido RED nan ta sostene e mandatario Lopez-Tromp. “Nos no tin niun problema pa colega Marisol sigui como minister.”
Lampe a relaciona e situacion cu a surgi cu e mandatario Lopez-Tromp manera cu den tur famia tin diferencia di opinion. “Te hasta por surgi den e miho famia por tin pleito den cas.” Pero esey no kiermen cu e cas ta bay for di otro, el a bisa. E no por papia di otro partido den coalicion, pero di nan banda –segun minister Lampe– nan ta ‘contento cu nos colega Marisol’.
Igualmente el a aclaria cu e presencia ayera mainta di lider di RED, Ricardo Croes, na bestuurskantoor tabata pa atende algo totalmente diferente. Pero e no tin nada di haci cu e situacion cu a surgi cu Lopez-Tromp, na momento cu su mesun partido pa pidi pa e entrega su cartera.
