Segun minister Ruiz-Maduro uzando data di CBS: Desempleo prome cu Covid 5% despues di Covid 73.1%

Ayera mainta, minister di Finansa y Asunto Economico, Xiomara Ruiz-Maduro a referi un biaha mas riba tur esfuerso cu gobierno ta bin haciendo pa por brinda un sosten financiero na trahadonan y empresanan cu ta confronta un situacion dificil debi na e pandemia di Covid-19

Manera el a haci un dia prome den parlamento, el a referi con e ayudo financiero a wordo canalisa. Pero tambe e proceso cu ta wordo exigi for di Hulanda pa facilita e tipo di prestamo aki na cero interes. E mandatario a bisa cu e no ta un situacion facil ‘en lo absoluto’. Pasobra e fondo aki, specialmente pa subsidio di salario, ta bini di Reino. Tambe tin condicionnan pa otorga e tipo di fondo aki, locual nan a splica na parlamento diaranson ultimo.

Ruiz-Maduro a bisa cu un di e condicionnan cu ta riba mesa ta e reduccion di gasto di AZV, y cu nan ta trahando riba esaki caba. E otro condicion tin di haci cu cortamento den gasto di operacion di gobernacion. Segun e mandatario, den tur e debatenan cu tabatin riba unda gobierno mester cuminsa corta su gastonan, e ta haya cu actualmente no tin espacio riba e tipo di discusion aki.

“Señores den e situacion cu nos ta, ni si nos manda tur ambtenaar cas. Ni cu nos stop mes tur gobernacion, gobierno di Aruba no ta bay tin e placa pa por yuda tur esnan cu tin mester di yudansa na e momento aki,” asina el a referi na e situacion actual. Esaki ta e motibo cu ta haci cu pais Aruba mester recuri na reino pa por haya e fondonan necesario. Pero e fondo aki ta bini condiciona di Hulanda, y e ta haya cu e asunto aki ta otro discusion riba su mes.

Desempleo

E mandatario tambe a referi riba e informacion cu gobierno a ricibi for di Oficina Central di Estadistica (CBS) relaciona cu empresanan cu ta vulnerabel, y hunto cu nan e cantidad di hendenan cu por keda sin trabao.

Prome cu Covid tabatin un indice di desempleo di 5.1%. Pero ora cu Covid a presenta na Aruba, e indice a subi na 73.1% di e poblacion cu ta traha a keda desemplea. Esaki ta e bista prome cu a bini cu e subsidio di salario. 77% di tur nos hende homber ta core e risico di perde trabao. Y un 66% di hende muhe tambe ta den e mesun risico aki, segun data cu e mandatario a uza di CBS. E ta haya cu esaki por duna un miho bista dicon gobierno mester bin cu cierto decisionnan. “Esaki no ta wega, esaki ta un realidad,” el a bisa.

Un di e decision ta reduccion di salario pa sector publico, compania estatal y fundacionnan subsidia pa gobierno. El a bisa cu e decision aki a crea descontento, pero nan no ta decisionnan facil. Pero e realidad ta – segun e mandatario – di tur esnan cu ta inscribi den SVb y cu tin un trabao, un 72.8% tin e risico di perde nan trabao. E ta refleha un hende na cada trabao, pero ainda e hende aki tin su famia.

E mandatario a bin cu e ponencia aki pa tur hende por mira e gravedad di e situacion. P’esey nan a bin cu un plan di ayudo y alivio financiero, el a bisa.