Gobierno di Aruba a habri e economia interno y ta de-escalando e medidanan di COVID-19. Aruba tin e COVID-19 bou di control y como resultado na e momento aki tin cero caso di COVID-19 riba nos isla. Ta di sumo importancia pa sigui traha y biba den e normal nobo pa por garantisa cu e economia ta sigui crece pa e pais y su habitantenan su desaroyo. Pa haci esaki posibel mester proteha nos pais entre otro di lanchanan cu por yega nos isla cu posibel fuentenan di COVID-19 na bordo cu ta drenta e isla na un forma descontrola.
Pa evita esaki sosode a haci un peticion di asistencia na Defensa den Caribe pa vigila e fronteranan cu unidadnan adicional. Defensa ta bini cu su Unmanned Aerial Vehicle (UAV) cual ta un vehiculo cu lo haci vuelonan riba lama pa vigila y controla e fronteranan di Aruba. Recien a ehecuta e prome vuelo di prueba cu e UAV. E UAV lo bula bou di guia y instruccionnan di Wardacosta di Caribe riba lama pa evita personanan yega ilegal riba e isla. E unidad ta ekipa cu camara na bordo cual por detecta señal of botonan cu ta haci intento pa yega cu personanan indocumenta na bordo. Na momento cu e UAV detecta algo e ta alerta Wardacosta cual lo dirigi un unidad pa investiga e contacto riba lama.
E specialistanan di UAV mester a pasa den un proceso estricto di cuarentena y a biba 14 dia den isolacion. Nan temperatura a ser monitoria y a controla si nan tin sintomanan di malesa. Despues di e 14 dianan di cuarentena tur persona por a sali pa por cuminsa na e trabou cu nan a bini pa haci, cual ta maneha e vuelonan di e UAV.
E UAV di Defensa den Caribe ta na Aruba pa vigila Aruba su fronteranan y lama pa proteha e pais pa COVID-19-virus no bolbe lanta cabes. Cu e UAV Wardacosta tin ‘eyes-from-above’ y ta un unidad aereo adicional pa yuda cu e trabounan di interseptascion di lanchanan dor di Wardacosta prome cu nan por yega tera.
