Un noticia no mucho agradabel pa esunnan cu ta gusta musica clasico na Aruba. Durante e temporada di vakantie aki nan no lo bay disfruta di e conciertonan organisa den cuadro di Aruba Symphony Festival & Academy (ASFA) na Cas di Cultura.
E musico Simon Gollo, kende ta fundado y director artistico di e festival aki, a informa riba e pagina di Facebook oficial di ASFA cu e Coronavirus (COVID-19) a afecta cantidad di evento den henter mundo. Entre nan festivalnan a wordo cancela, y ASFA ta un di nan. Cantidad di institucion educativo a cera nan porta, y nan a dicidi pa haci cursonan via online.
Gollo a bisa cu un di e mayor atractivo di nan festival tin di haci cu e experiencia di bishita ‘un di e islanan mas bunita di nos tera’. Sinembargo varios pais a tuma e decision di restringi e trafico aereo. Sin lubida e cuarentena y distanciamento social cu ta afecta e realisacion di cualkier evento.
Ademas nan ta considera masha importante e aspecto di salud y siguridad, locual pa nan ta un prioridad pa tur esnan cu ta asisti na nan festival. “Nos preocupacion ta e siguridad di e poblacion di Aruba, y e siguridad di nos maestronan y studiantenan talentoso cu ta asisti den e festival cada aña,” el a bisa. Pa e motibo ey nan a dicidi di cancela e di seis edicion di e festival aki.
Gollo den su mensahe a laga sa cu awor e ta comparti e nostalgia di no por a celebra e festival e aña aki. Pero cu e ta hiba cune e alegria di cinco edicion exitoso di ASFA. “Nan a genera momentonan inolvidabel pa nos maestronan, participantenan y publico.”
Pa ultimo el a pidi pa tur hende mantene safe y pa nan keda visualisa e dia cu nan lo por haci musica hunto.
