No tin nada mas serio y tristo ora cu un lider di bo pais no ta sincero cu su pueblo, no tin e respet pa henter pueblo y simplemente ta haci loke cu e kier pa asina sirbi interes di solamente un grupito cerca di su partido y di su famia. Mike de Meza miembro di fraccion di AVP ta mustra cu ya caba Prome Minister Evelyn Wever Croes a demostra ‘from day one’ cu e no ta un lider di palabra, cu kico cu e bisa tin ora e mes no ta kere aden corda kere den su pueblo.

“Pueblo por corta con den formacion di e actual gobierno, el a sigura pueblo cu su gobierno lo tin shete minister, cu cualkier lider politico cu kier ta den gobierno cu MEP, mester acepta esey.

Wel den menos di un siman pueblo a haya e prome sorpresa ora cu bou presion di lider di POR, el a sucumbi y bay over na 8 minister oficial y un otro minister na banda.

No solamente esey, despues di ta sinta dushi den stoel di gobierno, Premier Evelyn a dicidi di amplia su gabinete, nombrando un ‘gabinete substituto’ y entre otro a contrata Nel Oduber ex Prome Minister, Rudy Croes ex minister di husticia cu Hulanda a kita su cartera for di dje cu aprobacion di Nel Oduber.

A contrata Nilo Swaen ex minister di finansa pa yuda e actual Minister di Finansa kende aparentemente no tin mucho conocemento di e materia y a contrata Edison Briesen ex Minister di turismo pero kende awor ta experto den asunto di refineria.

Ta mesun prome Minister Evelyn aki a sigura pueblo cu su gobierno lo soluciona tur problema financiero sin introduci medida pero den prome luna a suta pueblo cu aumento di BBO y a ranca mas cu 270 miyon for di saco di pueblo.

El a introduci reforma fiscal nobo pa ranca ainda mas miyon for di pueblo y si no tabata pa falta di seriedad pa entrega presupuesto 2020 na tempo y e pandemia di corona virus, pueblo lo a conoce otro reforma fiscal cu lo a costa pueblo ainda mas placa.

Den prome siman di e crisis di corona, Prome Minister tabatin tempo pa regala Citgo un bye di miyones di florin, absolviendo e compania multi miyonario aki di tur obligacion financiero cu Aruba y solamente a cobra nan belasting cu nan debe.

Prome Minister a bin dilanti y bisa pueblo cu ya e refineria ta di Aruba bek y cu cara serio pero cu un sonrisa no mucho confiabel, a mustra cu gobierno lo traha pa logra reapertura di e refineria di San Nicolas.

Tambe Evelyn a papia di un transparencia pa loke ta e proceso di e tankinan di almacena petroleo y cu lo informa tanto Parlamento como pueblo di e proceso aki pero tin trabounan tumando luga y segun informacion ricibi, ya caba lo a firma contract cu un compania cu ningun hende sa ainda kende ta tras di esaki.

E grupo aki lo a tin contract pa trece petroleo for di Colombia y cu ya caba ta trahando riba mas tanki riba tereno di refineria, pa asina por sigura cu Aruba lo ricibi tur aña 25 miyon dollar na impuesto di huur.

Pues mientras cu Prome Minister a papia di transparencia, ya caba gruponan amigo y di family and friends tin cosnan caba regla, cosnan cla caba pa simplemente cuminsa sin cu e proceso aki a cana manera un gobierno decente lo haci.

Otro informacionnan ta mustra cu den e compania nobo aki lo bay emplea trahadonan local caminda practicamente partido MEP tin su lista di sostenedonan cu lo bin na remarca na prome luga prome cu otro hendenan loke lo no ta ningun sorpresa pa un gobierno cu nunca tabata sincero cu su pueblo,” Parlamentario Mike de Meza a declara.