Presidente di e trahadonan di refineria IOWUA, Sr. Boy Anthony a bisa cu e incertidumbre cu tabata existi cerca e grupo di trahadonan cu te ultimo momento a traha cu Valero den e refineria, a wordo aclaria debidamente.
Bon Dia Aruba a puntra presidente di IOWUA,Boy Anthony con a para cu e derecho adkiri pa e trahadonan cu e sindicato ta representa. Ya cu un grupo cu tabata trahando pa VMSA a resorta awor den e compania estatal RdA, pero con lo para cu e resto di trahadonan? El a bisa cardinalmente cu “tur cos a wordo regla na mesa”.
E sindicalista a declara cu nan a sinta na mesa cu Citgo, Refineria di Aruba (RdA) y nan abogadonan pa mustra nan e importancia di mantene un bon comunicacion. Aunke nan por ta di acuerdo of desacuerdo, pero basico ta cu tin comunicacion, ya cu nos ta un pais democratico.
Sr. Anthony a splica cu despues cu tabatin e incertidumbre, el a manda un carta pa aclaria e posicion di e trahadonan y defende nan derechonan cu nan a adkiri despues di hopi aña di trabou den e refineria. Sr. Anthony a agrega cu nan a sinta cu Citgo y Valero, igualmente RdA cu Valero, y “tur problema a wordo resolvi.”
Segun presidente di IOWUA, e trahadonan aki unda nan ta bay traha, lo keda den e plan cu nan tin y “nos ta keda cu tur beneficio. No tin problema!”.
Tur cos a wordo aclaria durante e reunion cu IOWUA a tene tanto cu RdA como Citgo. “Kiermen tur cos ta bayendo riba hopi bon caminda. Y tur loke no a bay bon, e mal comprondemento a wordo aregla. Aworaki nos por yam’e un smooth transition.”
Falta di comunicacion
Sr. Anthony a expresa su orguyo den cuadro di e acto di reapertura di e refineria na San Nicolas den man di Citgo Aruba, diabierna ultimo. El a destaca e trabou cu gobierno a haci, ya cu e ta consciente di e situacion dificil cu e trahadonan di e refineria a pasa aden despues di 2012, ora cu e refineria Valero a cera.
Igualmente despues di e discurso cu el a scucha for di ehecutivonan halto di Citgo y PDVSA, e sindicalista Anthony a bisa cu a sinta cu e vice presidente cu ta bay traha cu Citgo Aruba, kende ta un persona “hopi social”.
E ta kere cu tur cos ta bay cana debidamente den sentido cu tempo cu Coastal a habri, nan como trahadonan no tabata asina prepara. Pero aworaki cu tin un team di Aruba hunto y cu nos tin bon trahadonan di nos banda. E ta kere cu e trabou di e reapertura di e refineria ta bay ta un “success” tanto Citgo como pa Aruba.
