Ayera merdia un grupo di docentenan di Colegio Arubano a haci un protesta den silencio pa demostra nan mal contento cu nan tin cu e directiva actual SVOA.
Asina a duna di conoce juffrouw Vilma Lardey, ken tabata esun cu a sali hunto cu e grupo di docentenan y a dirigi algun palabra pa e medionan di comunicacion presente. E docentenan a para pafo di scol cu borchinan cu frasenan como ‘Wees stil ik bepaal’ y ‘Integrity is non-negotiable’ y tambe cu boca tapa pa mustra nan preocupacionnan y insatisfaccion.
Lardey ta un di e miembronan di e Comision di Docentenan di Colegio Arubano. El a duna di conoce cu tin 34 aña trahando na scol aki y tempo cu e tabata chikito, tambe e tabata alumno di Colegio. Como maestro el a laga di conoce cu su voz semper ta resona den su klas y den Colegio Arubano, pero el a sigura cu loke e kier ta cu su voz y di e mayoria di docentenan di Colegio lo resona pafo di scol.
“Nos ta spera cu nos voz lo por resona den henter comunidad di Aruba”, Lardey a bisa.
El a manifesta cu dia de awe nan tabata di luto y cu su curason yen di tristesa, nan a para dilanti di scol cu nan como maestronan y otro trahado di e colegio. Tambe el a splica cu nan no a haci e accion aki den oranan mas trempan pa motibo cu no kier pone trabou abou, pensando prome riba e bienestar di e alumnonan.
Ta p’esey e ultimo recurso cu maestronan lo usa ta pa bay den accion. Pero na dado momento nan mester lanta e voz pa nan por haya oido. Mayoria di maestro y otro trahadonan di Colegio a indica un gran disgusto pa locual ta pasando den nan scol. Apenas dos aña despues cu Colegio a haya un rector nobo na augustus di aña 2018, el a dicidi di entrega su retiro pa motibo cu no por traha cu e directiva actual den funcion.
“E maestronan di Colegio Arubano no tin confiansa den dicho directiva cu ta na mando desde 3 aña caba”, Lardey a expresa.
Asina mes, el a informa cu e directiva no ta actua na bienestar di e alumnonan y cu nan no tin ningun afinidad cu e enseñansa tampoco. Na mesun momento el a enfatisa cu e directiva no ta transparente den su maneho financiero pa cu scol, pa motibo cu nan ta puntra directiva si nan berdaderamente ta traha pa scol progresa of si tin algun otro motivacion. “Nos no ta mira e maneho actual traduci den e bienestar di enseñansa na nos scol”, el a bisa.
Cu e accion aki nan lo a kier vocifera nan inkietud pa cu e situacion cu ta reinando desde por lo menos 3 aña na Colegio Arubano. Pa cu esaki el a declara cu “awor ta basta” y nan como maestro a entrega pa varios instancia, entre otro Obispado di Willemstad, un carta di desconfiansa contra e directiva actual di e fundacion.
Den e carta aki, Lardey a comenta cu nan a pidi pa e directiva entrega su retiro inmediatamente, ‘di e manera aki so trankilidad por bin bek Colegio Arubano’, el a finalisa.
