Desde cu a anuncia cu Gobierno di Reino a tuma e decision di nombra e actual Ministro Plenipotenciario como e proximo Gobernador di Aruba, ta parce cu ta un bom a cay den Bestuurskantoor. Tanto asina cu aparentemente a hasta lubida normanan di respet cu ta exigi por lo menos un comunicado di prensa pa felicita e persona, y de paso tambe su colega Gobernador interino. Fuentenan normalmente bon informa ta conta cu nos Prome Ministro ta rabia y decepciona. Mester bisa cu esey realmente no ta ni interesante ni importante. Y pakico no? Pasobra, manera e propaganda di un marca di chips tabata bisa:” It’s nacho call!”
No ta na abo como Prome Ministro di Pais Aruba pa determina ta ken lo ta e proximo representante di Rey den e comunidad aki! Esey ta esunnan cu ta carga responsabilidad politico pa e decision ey na nomber di e Rey, lo dicidi y a dicidi. End of the story. Cu den banda tin algun hende ta murmura cu mester haya oportunidad pa ‘nader overleg’; esey ta algo cu mester a tuma luga den e reunion mes, asina ta cu esey ta ‘gepasseerd station’. Y ademas gobierno Hulandes semper tin mayoria den Conseho di Ministro di Reino.
Claro cu den e proceso semper ta consulta cu gobierno di Aruba, y hasta cu otronan, semper na un manera discreto. A consulta tambe, te cu gobierno a entrega, aparentemente, un lista di tres nomber. Ta irelevante ken nan ta. Loke ta remarcabel cu atrobe gobierno di Aruba no sa di mantene discrecion y cu nos por comprende nan mes a divulga nomber di e personanan cu nan a propone.
Ni cuanto e Hulandesnan purba bisa nan cu esaki ta un proceso delicado, e soberbia di ta todopoderoso riba Aruba durante shete aña aparentemente a subi nan cabes y nan no ta tende ni rasona. A pesar di tur e experiencia huridico cu cual nan ta conta, ta parce cu kier continua cu e wega di ‘troce brasa’, djis pasobra recientemente a logra bastante cu mustra agresivo contra Hulanda.
Pero tin otro momento cu nos ta mira un otro cara di e gobierno aki. Asina nos por a tuma nota cu den e celebracion di e inicio di rehabilitacion di e refineria un Chavista bisti di wayabero cora ta bin bisa nos den nos cara cu nos ta parti di e proyecto continental, e soño di su fayecido Comandante en Jefe. Y niun hende ta reacciona! Tabata falta solamente pa e mustra nos riba e posibilidad cu ta contempla den articulo 14 di Constitucion di 1999 di Republica di Venezuela, cu “ ley lo establece un regimen huridico special pa e teritorionan cu pa liber determinacion di su habitantenan, y cu aceptacion di Asamblea Nacional, ta incorpora nan mes den esun di e Republica.”
Nan lo tin e curashi pa bay bisa gobierno Venezolano cu nos por ta ruman, pero no necesariamente nos ta aspira biba den mesun cas! Mas grandi nos preocupacion mester bira ta kico tur e hendenan aki a firma na nos nomber na Palacio Miraflores. Increibel e actitud aki di bringa cu Hulanda y practicamente alaba un pais cu ta cayendo for di otro, unda un gran parti di poblacion no tin ni cuminda drechi riba mesa. Nos mandatarionan aparentemente no sa mas na cual entidad nan ta pertenece.
Bolbiendo na e topico di nombramento di Gobernador: loke no ta resona den e informacion den prensa ta e exigencia y criterionan cu Hulanda tin pa e puesto di Gobernador. Na prome luga e mester ta un persona cu un formacion academico como hurista o economista, preferiblemente e prome. Carera y reputacion intachabel ta importante y conocemento di e materia cu un gobernador mester atende ta importante tambe. Y… edad. Un persona no mester tin un edad tal cu ta haci imposibel pa e sinta dos termino di seis aña den e puesto. Ta busca anto preferiblemente un persona bao di 55 aña, cu por cumpli e dos periodonan facilmente.
Esey so caba en berdad ta haci e lista di candidato bastante cortico. Insisti cu un cierto persona mester bira, y mucho menos si ta hiba e bataya den luz publico, no ta yuda, al contrario. Segun fuente na Den Haag, ta basta tempo pasa caba Hulanda a descarta henter e lista cu Prome Ministro a presenta, pa motibo cu nan no tin intencion di complace nos Prome Ministro cu ta desea di hiba e asunto den luz publico.
Di igual manera tur e comentarionan, cu despues di e nombramento di nos actual Gobernador, unda lo tabatin un deal entre partido geel y partido berde, cu awor lo a toca turno na e partido den gobernacion pa ‘pone su candidato’, tur esaki ta resulta nonsense pasobra no ta pa nan dicidi. E baño di awa friu pa e partido den gobernacion ta bon mereci. Ora bo ta kere cu na e nivel aki bo por manipula tur hende y manipula tur informacion, cu e creencia cu bo ta pone Den Haag actua segun bo kier, esaki ta e resultado. “Koekje van eigen deeg”!
