Diabierna ultimo dos restaurant den centro di ciudad a wordo cera temporalmente, pa falta di higiena durante un accion realisa pa varios departamento di Gobierno.
Directora di departamento di Higiena, Yvette Geerman a declara na Bon Dia Aruba shete departamento cu a participa den e accion aki, entre nan Dimas, Polis, Departamento di Labor, Brandweer, Departamento di Higiena, DBZ cu ta cay den Departamento di Salubridad Publico (DESPA) y DTI. Bou peticion di departamento di Brandweer nan a controla ocho localidad cu no ta cumpli cu reglanan y leynan stipula pa opera e tipo di establecimento comercial aki.
Di e 8 localidad cu a wordo controla tres di nan a wordo cera, dos di nan a wordo cera pa dos dia y otro pa un dia. Tin otro localidad cu a haya un yamada di atencion, ya cu tabatin cosnan cu no tabata den su luga.
Control
Normalmente nan ta controla e tipo di localidad aki, ya cu e ta un accion rutinario di nan trabou. Pero e ta admiti cu basta tempo cu no tabata sosode e tipo di accion aki conhuntamente, sino individualmente.
El a laga sa cu e tipo di accion aki lo por sigui, pero aworaki nan no tin nada plania ainda. Esaki ta depende di e situacion di e departamento envolvi; of si tin situacionnan cu ta demanda pa nan traha conhuntamente. Specialmente considerando cu nos ta yegando na e temporada festivo di Pasco y fin di aña caminda cada departamento tin nan respectivo trabou riba nan mes, entre nan esun di controla. “Si tin un keho of algo asina nos ta keda controla e localidadnan.”
Sr. Geerman a bisa cu e tipo di accion aki a mustra su efectividad, pero semper nan mester sigui cu nan trabou di control. Nan meta ta esun di proteha nos comunidad contra cualkier tipo di malesa relaciona cu consumo di alimento den mal estado of traha sin e proceso di higiena confiabel. El a trece su preocupacion cu e doñonan di e tipo di establecimento aki mester compronde cu hasta un hende por muri pa causa di cuminda contamina of den mal estado.
Carchi di salud
Riba e situacion di carchi berde cu departamento di Higiena a bin cu man pisa controlando nan, Sra. Geerman a bisa cu e accion aki tabatin su efecto. Pero “nos ta notando cu si nos no keda controla nan, sinembargo nan no ta cumpli completamente cu e rekisito.”
Ainda nan ta hayando bastante localidad cu ta traha cu manipulacion di cuminda y bebida cu no tin nan carchi di salud of carchi berde na ordo. E ta remarca cu e exigencia di e carchi di salud ta algo cu ta conforme di ley. E ta recorda cu “unabes cu bo ta traha cu cuminda of cu bebida e ta un exigencia cu bo mester tene bo carchi di salud na ordo”.
P’esey departamento di Higiena lo keda haci enfasis riba e cumplimento di tene na ordo e carchi berde, ya cu nan lo sigui pone atencion y controla nan.
Si durante nan accion di control rutinario nan ta descubri cu e trahado no tin su carchi di salud, e persona ey no por traha. Y si tin un localidad of negoshi cu niun di nan hendenan no tin nan carchi di salud, e negoshi ta keda cera.
Igualmente el a laga sa cu tin e impresion cu e localidad cu a wordo controla caba y/of a haya un bishita di e instancia competente aki, ya nan no lo wordo inspecciona mas a lo menos pa un par di aña. Sra. Geerman a bisa bon cla cu esey no ta berdad.
“Unabes cu un localidad ta prepara cuminda, e lo haya bishita di nos.” E berdad ta cu no tur localidad ta haya un bishita frecuente debi na otro factornan. Pero nan ta keda controla y bishita e localidadnan, y no un biaha sino varios biaha.
Den un aña di tempo segun Sra. Geerman- un localidad por haya mas cu un biaha bishita di nan. E por ta durante accion of tambe durante un accion rutinario di departamento di Higiena. Pero tambe ora cu e localidad aki ta haya keho di nan clientenan cu ta denuncia nan cerca
nos autoridad competente.
E meta tras di e accion aki ta pa e doño di e localidad ya sea restaurant of otro negoshi di bebida y cuminda por bira mas consciente riba importancia y responsabilidad cu e tin di anda cu cuminda, ya cu salud di hende e ta.
