Den e dianan aki nos ta keda haya un sorpresa tras di otro cu ta concerni Colegio Arubano. Redaccion di Bon Dia Aruba a ricibi den su buzon electronico copia di un carta cu presidente di Ouder Commissie Colegio Arubano (OCCA) a manda pa Stichting Voortgezet Onderwijs Aruba (SVOA) cu ta e nomber nobo pa SMOA, cu e organisacion a keda usa tambe.
Den e carta fecha dia 27 di mei 2020, drs. Giovanni Koffy ta firma como presidente di OCCA, y ta anuncia cu e directiva di OCCA a dicidi di propone (‘voordracht’) sr. Robert Croes como representante di OCCA den directiva di SMOA. Den e carta no ta duna ningun indicacion pakico a yega na e decision aki, pero nos a logra haya sa cu den pasado e actual presidente a drenta directiva di SVOA como representante di OCCA y a yega e momento di pone su mes re-eligible, ya cu e periodo di tres aña a vence den e dianan aki.
Redaccion di Bon Dia Aruba a trata di drenta den contacto cu sr. Koffy, pero no a logra comunicacion. Tin diferente pregunta cu ta surgi aki, no tanto pa e proposicion di e persona, sino mas bien tocante e caracter y estado actual di e Oudercommissie. Esaki ta un organo reconoci legalmente , tur scol pa ley mester tin un Oudercommissie, asina tambe Colegio Arubano. Esey ta stipula pa landsverordening Voortgezet Onderwijs Aruba (AB 1989 no. GT 103). E structura, forma di elegi e miembronan di e oudercommissie lo mester ta regla den un decreto special, un Landsbesluit Houdende Algemene Maatregelen (LB HAM), segun articulo 44 di e Ordenanza menciona, pero asina leu cu nos ta na altura nunca a emiti tal decreto.
Con e comision aki ta funciona anto nos a haya sa di un informante cu a prefera di keda anonimo, pero cu tin gran experiencia na e scol. Segun e fuente, no tabatin nunca un structura mas fiho pa e comision y realmente nunca tabatin eleccion manera e ley ta bisa. Mayornan mas interesa den loke ta pasa na e scol cu nan yiu ta bay tabata participa den e actividadnan di e comision a traves di añanan a titulo personal.
Esaki ta haci naturalmente e pregunta surgi con e comision ta yega na un presidente cu ta comunica como tal den asuntonan formal manera nombramento di un persona den un organisacion cu personeria huridico manera SVOA. Den e caso particular aki, pa cu e persona cu e comision ta propone (nombra) como su representante, ora mester registra algo asina na Camara di Comercio, ta surgi algun pregunta interesante: con a yega na e decision den e comision pa propone e representante? Tin documento (notulen) di un reunion teni di forma valido pa tuma e decision aki? Hustamente den tempo di tanto controversia ta bon pa e asuntonan aki ta bon regla na e scol y por lo tanto tambe den ley. Nos ta kere cu ta bira tempo pa ministerio di enseñansa tira un bon vista riba e tipo di asunto aki, cu por tin consecuencia legal hopi mas leu cu hende por kere a primera vista.
