Dialuna den oranan di anochi, minister presidente Evelyn Wever Croes a relata cu Aruba no tin caso positivo di Covid-19 pa mas di un luna. Asina mes el duna di conoce cu ainda tin 164 persona den cuarentena y cu henter comunidad mester tin e compromiso pa percura cu e 164 persona ta keda paden durante cuarentena.
Pa via di esaki, el a menciona e caso di pais bisiña Corsou, unda aworaki tin casonan nobo positivo y cu gobierno di Aruba kier evita cu esey lo ta e caso aki tambe. Y si lo yega, nan kier evita cu persona contagia tabatin contacto cu mas hende.
E personanan den cuarentena a bin recientemente for di exterior, Wever-Croes a sigura y Task Force ta sigui haci su trabou y si e personanan no ta cumpli cu e medida di keda den cuarentena obligatorio, lo haya un boet severo.
Asina mes, Wever-Croes a señala cu e fasenan di reapertura di economia ta bayendo bon. Nan ta preparando pa autorisa e bishita pa hende grandi den casnan di cuido y nan ta evalua e posibilidad di habri barnan, casino y tambe actividadnan publico.
Ademas, Wever-Croes a informa tocante e habrimento di fronteranan, pa motibo cu luna di juni a yega y e meta tabata pa na luna aki gobierno por yega na decision final di ki dia e frontera ta habri. Aunke no tin un fecha specifico ainda, pero nan ta preparando pa esey. E fecha posibel ta entre dia 15 pa fin di juni cu kier yega na e decision aki.
Wever-Croes tambe a trece dilanti cu fin di siman ora e medida di toque de queda y otro flexibilisacion a tuma luga, algun ciudadano a sali pa celebra cu e medida aki a wordo kita y por a mira cu den varios luga tabatin aglomeracion di hende. Pa esaki, el a contesta cu e tin su reserva y su preocupacion pa loke ta trata e hendenan hopi cerca di otro y ademas hopi sushi benta riba beach. Esey “ta algo cu nos como Arubiano no ta acepta y no por sigui asina”.
