Booshi Wever (UPP): ‘No mas malgastamento di placa pero inverti den prioridadnan realisabel y duradero na beneficio di e habitantenan di Parkietenbos y di agricultor’

UPP ta constata cu Minister Marisol Lopez-Tromp no ta haciendo nada otro cu continua cu e mesun un maneho di su predecesor Otmar Oduber. Aruba ta den un crisis financiero grandi, acelera pa e pandemia di COVID-19. Salarionan ta wordo corta y hopi ta esnan cu a perde trabou den sector priva y manera ta nada e minister ta insisti di sigui haci uso di e servicio di un abogado di Corsou uzando mentiranan pa purba di hustifica esaki.

Nos a mustra cu den e departamento di DIP mes tin 2 hurista y otro dos hurista consultants, sin lubida e alrededor di 100 abogadonan cu conoce e materia pa haci e trabou relativamente facil aki. E minister parce no ta realisa cu nos ta den un tempo cu gobierno no por ta malgasta placa cu no tin, pero parce cu pa partido POR “the sky is still the limit.” Escogencia pa prioridad y intencionnan robes no ta stop aki. Un otro prueba ta cu e minister un dia prome cu e caso di un habitante di Parkietenbos contra gobierno a wordo trata, ta core firma un contracto cu un compania local pa loke ta trata e trabounan na Sero Teishi. Intencion parce di no ta pa yega na un solucion definitivo pa Dump, pero pa trata na influencia e resultado di e caso sumario aki.

Mientrastanto asuntonan urgente cu ta cay bou su cartera, no tin solucion ainda. Banda di e dump di Parkietenbos cu keto bay ta na candela y Sero Teishi cu ta sigui manda holor desagradabel, tin keto bay e situacion di Selimar mes cu ta na rand di un bancarota definitivo, un incinerator chikito cu ainda no por cuminsa funciona y tur e 3 plantanan di RWZI-nan cu ta keto bay den un estado super malo. Na september 2018 caba  e minister anterior a wordo mustra riba e falta di mantencion di e RWZI na Bubali y cu mester haci algo hopi urgente riba e plantanan aki. Pero e minister anterior a ignora e conseho di DOW y a scoge pa privilegia un amigo sponsor cu e “rest fonds” di FDA  cu por a mitiga e situacion peligroso na e  RWZI-nan. A hinca e placa den saco di e sponsor aki pa compra di un incinerator chikito cu despues di casi un aña ainda no ta den funcion. Y esaki no ta motibo di un boycott manera ta e caso di B&L pero paso a cumpra un PORkeria.

E scandal di esaki ta conoci y como ciudadano mi a haci entrega di un keho oficial di corupcion na Ministerio Publico. Pa colmo  awor  nos tin comprendi cu door cu Selimar no tin placa, kier pasa e operacion den man di un compania priva. Pregunta ta cu si e compania aki lo bay hacie pornada of atrobe e pueblo lo mester bay paga pa e previlegiamento di un sponsor cu SI ya caba a haya su 1.8 miyon florin?

Tin dos motibo pa atende cu e RWZI-nan. Na prome luga expertonan a adverti cu e mantencion ta importante pa evita un desaster ecologico como tambe pa e industria d Turismo.  Esaki lo nifica un inversion di alrededor di 15 miyon florin, placa cu no tin. E di dos motibo tin di haber cu desaroyo di nos agricultura. Ultimamente tin un promocion grandi pa stimula agricultura, pero un di e problemanan grandi ta e scarsedad di awa na Aruba. Awa no ta yobe, damnan ta bashi y awa di WEB ta caro. Cu plantanan di RWZI den bon condicion, lo por a uza e awa aki pa agricultura. Mester evita pa bay atrobe en busca di un solucion ad-hoc. Cualkier solucion mester ta a base di un plan integral cu ta regarda na prome luga procesamento y recogemento di desperdicio na unda ta inclui e dump na Parkietenbos y RWZI. Aki nos di UPP lo urgi e minister pa atende di nobo cu un solucion na unda ta inclui Bouldon & Lawson. Ta conoci cu tin por lo menos 3 conseho pa pone e planta di WasteAway di B&L den funcionamento back. Nos sa cu nan a haci un investigacion caba riba peticion di e minister anterior y cu nan solucion lo no ta di e costoso ey.

Tin scarsedad di placa pa inverti den proyectonan cu ta di sumo importancia manera nos a menciona den e articulo aki y p’esey no ta aceptabel pa (mal)gasta placa na prioridad y intencionnan robes. Tin un plan integral traha caba cu ta un plan total cu ta encera alabes yenamento di e buraconan cu tin na Aruba cu a ser coba pa saca santo, grijs y piedra cu FLUFF.  E plan aki mester wordo adapta na circunstancianan nobo cu ya den pasado a pensa con pa soluciona no solamente e problema di Dump pero tambe esun di e RWZI-nan cu lo trece e solucion realisabel y duradero cu lo nifica no solamente un alivio pa e pueblo di Parkietenbos, pero tambe pa nos agricultornan cu por haya awa cu nan por usa y na un prijs rasonabel.