Segun Mediador di Gobierno, Anselmo Pontilius, e parti cu e dunado di trabao ta aporta un 20% riba salario di trahado, no ta regla legalmente. E asunto aki a crea basta confusion y mal contento tambe.
Den e reunion e dialogo tripartiet –gobierno, dunado di trabao y sindicato– a wordo firma un acuerdo, considerando e condicionnan cu Hulanda a bin cune pa otorga ayudo a base di prestamo sin interes. Ta asina cu nos a haya financiamento pa subsidio di salario, pero bao e exigencia cu e tres partido envolvi mester bin cu un documento firma di mutuo acuerdo.
Hopi a interpreta cu a base di e documento aki, un 20% mester bin ariba un 60%, pensando cu e dunado di trabou tin un compromiso legal. Pero esey no ta e caso, Pontilius a aclaria.
Den e caso aki, si e dunado di trabao ta mustra su empleadonan cu ta un 60% so e por paga, no tin niun caminda legal cu por obliga e dunado di trabao pa paga acerca un 20%. Esey ta e caso tambe den varios compania. Departamento di Mediador di Gobierno ta bin atendiendo e situacion aki durante e ultimo dos simannan.
Tin companianan cu ainda ta den un debate, caminda varios grupo di trahado ta rechasa e pensamento cu ta un 60% so nan mester haya di nan salario. Esaki pa medio di e plan di ayudo di subsidio di salario cu gobierno ta bin otorgando na empresanan pa medio di Banco di Seguro Social (SVb). Pontilius a laga sa cu e ta logico cu si un trahado ta haya un 60% di su salario, esaki kiermen cu e trahado lo traha menos dia pa siman.
E hecho cu e trahado ta ricibi menos pago y tambe for di punto cu e trahado mes ta entrega un 20% di su salario, ta trece malcontento. Awor ta resulta cu loke e trahado a pensa cu un 80% di nan salario nan lo por haya, e no ta resulta asina. Ya cu e dunado di trabao por mustra cu nan no tin un 20% pa paga di su banda, sino 60% pa medio di e subsidio di salario.
Tin companianan cu si a paga 80% y te hasta mas, pero no ta mucho compania na Aruba cu a haci esaki. Tur hende ta carga speransa cu mas lihe posibel lo por bin un cambio. Pero si nos ta realistico e cambio aki no lo bin den e proximo lunanan. Particularmente pa e sector di restaurant, casino y hotel. Seguramente y debi na e medidanan pa evita mas contagio di e virus, nos no ta bay mira ocupacion di hotel aumenta di biaha.
E circunstancia aki ta haci –segun Mediador di Gobierno– cu e trahado mes tin un tarea grandi di reahusta su presupuesto familiar.
