Un raket construi pa compania SpaceX di Elon Musk a sali di Tera cu dos Mericano diasabra, dunando apertura na un era nobo den biahe espacial comercial, y poniendo Merca un biaha mas den negoshi di lansa astronauta den orbita for di tereno nacional pa prome biaha den casi un decada.
Doug Hurley y Bob Behnken di NASA a core den shelo abordo di un capsula Dragon blanco cu preto riba un raket Falcon 9, saliendo pa 3.22pm for di e mesun pad di lansamento usa pa manda tripulacion di Apollo na Luna mey siglo pasa. Algun minuut despues, nan a logra drenta orbita di forma safe.
“Ban cende un bela”, Hurley a bisa net prome cu despegue, fiando e palabranan historico usa pa Alan Shepard riba e prome vuelo espacial humano Mericano, na 1961.
Ayera, e dos homber a haci nan yegada na Stacion Espacial Internacional (ISS), 250 miya riba Tera, pa un estadia di hasta cuatro luna, despues di cual nan no bolbe cas cayendo den lama, algo cu mundo no a mira desde añanan 1970.
E mision a desaroya memey di e tristesa di brote di coronavirus, cu a cobra bida di mas di 100mil Mericano, y disturbionan racial rond Merca tocante e caso di George Floyd, e homber color scur na boei kende a muri na man di polis di Minneapolis.
Oficialnan di NASA y otronan a expresa speransa cu e vuelo lo alegra espiritu Mericano y mustra mundo kico Merca por haci.
SpaceX a converti den e prome compania priva pa lansa hende den orbita, un logro anteriormente di apenas tres gobierno: Merca, Rusia y China.
E vuelo tambe a termina nuebe aña di secura di lansamento pa NASA. Desde cu a retira e space shuttle na 2011, NASA a depende riba astronavenan Ruso lansa for di Kazakhstan pa transpotra astronauta Mericano na y for di ISS.
Durante ultimo añanan, NASA a pasa e trabou di diseño y construccion di su proximo generacion di astronave na SpaceX y Boeing, otorgando nan contract di $7 biyon den un public-private partnership (PPP) cu meta pa reduci costo y impulsa innovacion. E astronave di Boeing, capsula Starliner, no ta programa pa transporta astronauta sino te 2021.
NASA tin plan pa depende en parti riba partner comercial mientras ta sigui su siguiente metanan: manda astronauta bek riba Luna dentro di algun aña, y despues na Mars den añanan 2030.
Durante un rally despues di e lansamento, presidente Donald Trump a elogia Musk, proclamando: “Awe un biaha mas nos ta orguyoso di lansa astronauta Mericano den raket Mericano, e miho di mundo, for di aki riba tereno Mericano.” El a priminti un ‘futuro di dominio Mericano den espacio’.
E prome intento pa lansa e raket diaranson ultimo a keda cancela menos di 17 minuut faltando, pa motibo di lamper. Diasabra, clima di tormenta a menasa di pospone atrobe, pero condicion a mehora net na ora.
Publico den Kennedy Space Center tabata estrictamente limita pa coronavirus, y e publico tabata apenas algun miles. Pa conteo di NASA, mas di 3 miyon persona a mira online.
A pesar di insistencia di NASA pa publico keda safe na cas, hende a subi caya y beach, algun di nan sin mondkapje ni teniendo distancia social.
Hurley, un marinier retira di 53 aña di edad, y Behnken di 49 aña, un coronel di forsa aereo, ta veterano di dos vuelo cu space shuttle cada un.
Unabes den orbita, Hurley a revela cu e capsula a ricibi nomber Endeavour, un nomber historico den exploracion, tambe duna na un di e space shuttle.
E mision di diasabra tabata considera tecnicamente un vuelo di test. E proximo biahe di SpaceX na ISS, programa pa fin di augustus, lo tin un tripulacion completo di cuatro persona: tres Mericano y un Hapones.
Cu e astronave na caminda, Musk a bira emocional papiando di e peso di su responsabilidad pa bida di e astronautanan y nan famia, notando cu e regreso na Tera ta mas dificil cu e acenso. Toch, Musk a bisa cu e no tabata nervioso mescos e tabata pa e prome intento diaranson. “Awe, mi no sa, a sinti manera destino tabata alinea”, el a bisa.
