“Nos no tin caso registra positivo na Aruba na e momento aki,” asina prome minister Evelyn Wever-Croes a declara durante e conferencia di prensa di diabierna anochi. Pero el a laga sa cu nos mester keda alerta, pasobra nos no ta cla ainda.

El por a mira cu tin asina tanto celebracion riba caya y cu hopi hende a tuma e momento aki pa distrae y relaha. Pero el a recorda nos comunidad cu nos no a sali di e crisis ainda. “Nos no a sali di e riesgo ainda.” Aunke nos tin cero caso activo di coronavirus ta pone nos den otro contexto, pero nos mester keda alerta.

Di un banda nos tin un grupo grandi di persona den cuarentena. Pero nos tambe mester cuminsa pa e siguiente pasonan cu ta spera nos, entre otro ora cu nos frontera ta wordo habri, y nos lo cuminsa ricibi bishitanan di afo.

Awe nos ta cuminsa fase 3, cu ta inclui otro sectornan economico cu ta cuminsa habri. Entre nan benta di lotto, catochi y weganan di number ta cuminsa awe te cu 6:30 di atardi. Esaki no ta inclui casino. Tambe restaurant y bar por cuminsa, incluyendo nan servicio parti paden te 10or anochi. E nivel aki ta inclui spa, massage, salon y sauna. Awe tambe mayoria di scol ta habri bek.

Alerta y cauteloso.
E hecho cu awe cu nos ta conoce un fase of nivel nobo di flexibilsacion di nos actividad economico, el a reitera cu nos mester keda alerta y cauteloso riba aspecto di salud. “Nos no kier cu atrobe nos ta bay haya un ola nobo di e virus aki y nos no por control’e.” Nos mester keda prepara pa un eventual siguiente ola. E mandatario a bisa cu nan ta casi sigur cu Aruba lo haya caso nobo.

Sinembargo el a cualifica como un dia hopi grandi e hecho cu e ultimo pashent cu tabata positivo a test negativo. Pero tambe un hecho di alegria, pasobra finalmente e pashent aki por a sali for di cuido intensivo, y actualmente e ta recuperando den hospital.

El a bay bek riba e dia cu e virus a haci su presencia 13 di maart ultimo na Aruba. Den tres siman no a yega nos peak cu tabata 71 caso. Ya cu despues di e tres siman ey, e casonan a cuminsa bira menos y mas hende a cuminsa recupera. Actualmente nos a yega na cero caso activo, pero te ainda nos tin cantidad di persona den cuarentena. Esaki ta pone nos keda na alerta y ainda cu preocupacion.

El a probecha pa haci un apelacion fuerte pa cada un di e 161 persona den cuarentena pa tene nan mes na e reglanan cu e cuarentena ta exigi. E no solamente ta poni den ley, y e ta un regla cu si bo no ta cumpli cune, bo ta haya boet. Pero e ta haya cu lo mas importante ta pa hacie, pasobra ‘bo ta stima bo mes. Bo ta stima bo famia y pasobra bo ta stima bo pais’.

Igualmente e tabatin palabra di elogio pa henter comunidad. El a bisa cu durante e periodo aki nos a demostra cu nos por y cu ‘ora nos uni tras di un meta comun nos por vence’. El a expresa algun cualidad manera disciplina y comprension di nos pueblo, pero solidaridad durante e crisis aki. P’esey el a laga sa cu como gobierno nan ta sumamente satisfecho di por a mira tur loke a wordo haci durante e lunanan ultimo aki.

El a gradici tur esnan cu a haci exitoso e forma con Aruba a atende cu e presencia di e virus. Den su elogio e prome mandatario a inclui tur hende cu ta ‘biba den e pida di baranca aki’. Pero tambe el a menciona cu nos mester corda di e tres persona cu tabatin e virus aki, ora cu nan a fayece. “Nos oracion y pensamento ta cu e famia aki…”