E situacion actual cantidad di trahado ta sinti nan mes insigur y nan puesto di trabao menasa.
Pero tambe e hecho cu algun dunadonan di trabao ta probecha e excuus di conoravirus/Covid-19 pa comete abuso contra nan trahadonan – bahando nan salario substancialmente y biniendo cu condicion nobo unilateral y sin hustificacion – tur esaki a yuda pa bira tera fertil pa sindicalismo florece.
Organisacionnan sindical a cuminsa haya solicitud pa nan por drenta den e tipo empresanan aki cu no a tene cuenta cu e derecho adkiri di nan trahadonan. Mediador di Gobierno, Anselmo Pontilius a bisa cu intermediacion a wordo pidi pa algun casino, entre nan Excelsior Casino y Cool Casino, pero tambe algun otro solicitud pa referendum a cuminsa drenta cerca dje.
Recientemente el a sostene un reunion basta largo como mediador cu sindicato FTA y gerencia di Cool Casino pa salario cu no a wordo paga. E tabata un reunion cu a clarifica varios punto. Finalmente e trahadonan a haya pago debi na e ayudo di subsidio di salario.
Tambe a drenta dos peticion di referendum di FTA, un na Little Switzerland y otro na Eagle Beach Resort & Casino. Igualmente e por a compronde for di FTA cu nan lo bini e siman aki cu solicitud di referendum pa varios compania debi na discrepancia cu nan trahadonan.
“No por ta asina cu pa motibo di e crisis cu ta dramatico, un of mas dunado di trabao ta kere cu no tin ley existente. Esey ta totalmente robes,” segun Mediador di Gobierno, Anselmo Pontilius.
Igualmente diamars ultimo, nan a sinta cu gerencia di hospital y sindicato ABV. Mediador di Gobierno a haya un peticion pa yuda cu su mediacion, durante e reunion riba entrega si of no di condicionnan di trabao, sea primario of secundario. “E tarea di mediador ta pa mira si tin posibilidad pa intermedia y conseha unda cu por.” Igualmente den su rol di mediador, Pontilius por propone otro tipo di salidanan alternativo.
E ta haya cu mirando e situacion cu financiero y economicamente nos pais ta pasando aden debi na e crisis di e coronavirus, espacio pa mehoracion di salario ta dificil actualmente. E prome tarea ta pa percura cu mas hende por mantene cupo di trabao. Pero na e mesun momento tambe mester tene na cuenta cu no ta asina cu debi cu nos ta pasando den un crisis, algun dunado di trabao ta pensa cu tur nos leynan ‘ya ta benta den bari di sushi’, el a laga sa.
E ta bisa cu e dunadonan di trabao no por viola leynan existente, ya cu na cualkier caminda e trahadonan por bay corte pa defende su derechonan hancra den ley. Mediador di Gobierno ta mira cu e situacion cu nos ta pasando aden, ta demanda hopi trankilidad y comprension, entre dunado di trabao y trahadonan cu of sin sindicato.
