Booshi Wever: ‘Minister di infrastructura y medio-ambiente ta continua maneho cuestionabel di su predecesor?’

UPP a tuma nota cu Minister Marisol Lopez-Tromp, durante un conferencia di prensa, a wordo puntra pakico mester a busca un abogado di exterior pa defende un caso cu ta concerni DIP.

E minister a contesta literalmente cu ‘semper e ta wak e experticio y background di e abogado pa ora ta trata casonan grandi’. Segun su persona lo ta trata di un caso unda cu ta regarda ley di medio-ambiente y cu na Aruba nos no tin abogado cu ta cumpli cu tal rekisito. Ademas e ta bisa cu e abogado cu DIP a contrata ta cobra mes hopi cu cualkier abogado local.

UPP a bay averigua un tiki mas leu y nos a bin comprende cu e caso cu e minister ta referi na dje, no tin mucho di haci cu ‘milieurecht’, pero uno mas bien di ‘onrechtmatige daad’ y cu pa esaki lo tin suficiente abogado local cu por haci e caso aki. Mas babuca nos ta keda, ora nos a comprende cu no ta trata aki di un caso grandi manera e minister ta pretende, sino un kort geding, pa simplemente stop cu e molester cu e dump di Parkietenbos ta ocaciona den e bario pa e habitantenan.

Segun nos ta comprende cu ta trata di un caso basa riba burenhinder y onrechtmatige daad. Y no ta un caso basa riba milieuwet, pasobra Aruba no tin esey ainda.

Ta obvio cu keto bay, a pesar cu nos ta den un crisis, pa partido POR ‘the sky is still the limit’. Pakico nos ta bisa esaki? Pasobra nos tin comprondi cu DIP tin 2 hurista den servicio directo, y banda di esey tin 2 otro abogado por medio di ‘consultancy contracts’. Pues 4 profesional huridico, cu ta wordo paga cu fondo publico, paga door di pueblo, pero segun e minister lo no ta capacita pa prepara debidamente un defensa pa e departamento y e minister.

Ta interesante pa sa cuanto placa pueblo mester pa e contract di e ‘consultancy’-nan aki. Ki criteria gobierno y DIP ta uza pa tuma e profesionalnan huridico aki anto, siendo cu nan no tin conocemento riba milieurecht? Kico gobierno a haci pa e 2 huristanan cu ta den servicio directo di DIP, prepara nan mes riba e tereno di milieurecht?

Anto e colmo ta cu mester busca extra asesoramento pa un kortgeding, caso sumario, cu ta trata hinderverordening den e caso aki. Si encaso cu e 4 personanan aki lo no ta capaa, dicon no uza departamento huridico DWJZ cu ta cay bou su colega minister di Husticia y di partido POR, pa trata un ‘burenhinder’ y ‘onrechtmatige daad’? Dicon mester bay te Corsou? Anto Aruba tin mas di 100 abogado cu por trata e tipo di casonan aki, cu ta casonan masha comun mes.

Aruba no tin milieuwet ni tampoco milieurecht pa hustifica cu mester busca un abogado experto di afo pa bin haci un caso asina. Anto e colmo di esaki ta, cu ora nos di UPP a bay investiga e credencialnan di e abogado aki riba nan propio website di compania, e abogado en cuestion no tin NINGUN sorto di afinidad cu leynan cu ta trata medio ambiente. Es mas, ningun di su socionan den e bufete di abogado no tin tal experticio. E pregunta ta e ora ey, dicon minister mester bin gaña dilanti television cu ta trata di un caso grandi y cu e abogado en cuestion tin un experticio riba tereno di medio ambiente.

Pa colmo nos tin comprendi cu e aspecto ta algo cu ta cay bou di minister di Husticia y Salud, cu ta bou di minister di Salubridad. Y ambos tin un abogado masha renombra (wellpaid) den servicio cu por haci e trabou aki.

Pakico tanto profesional huridico den un solo departamento y pakico ainda ta necesario asesoramento door di consultants? Ta asina hopi caso huridico tin contra DIP of mester constata cu e minister actual ta sigui e mesun tactica cu su predecesor cu a yena departamentonan bou di su encargo cu personal, manera entre otro na Serlimar? P’esey lo ta interesante pa sa cuanto empleadonan nobo a ser tuma den servicio na DIP y cuanto e abogado for di exterior lo ta cobra, pasobra pakico un gasto extra mientras DIP ta sobrecarga cu hurista y abogado cu ya caba ta costa un dineral. Si no tin abogado bakia riba e tereno di medio ambiente con e minister por splica cu recientemente a busca un abogado local pa defende Serlimar?

Mesun abogado aki a defende Bouldin & Lawson den varios caso y gana ‘glansrijk’ tambe. Sin papia di un otro abogado cu desde 2005 a defende Serlimar na unda esaki a gana e 7 casonan cu a ser entama contra Serlimar e tempo aya den e asunto di B&L. Dicon no a uza e coordinador y second man di DIP cu ta co-escritor di un buki riba ‘milieurecht’ y ‘ruimtelijke ordening’?

Nos ta wak cu todo por todo ta busca manera pa gana un kortgeding contra di un grupo di habitantenan cu tin derecho riba loke nan ta reclama. Ta bon pa puntra con ta para cu dump, serlimar, y e incinerator chikito, y RWZI!

UPP ta urgi e minister pa atende di nobo cu un solucion na unda ta inclui Bouldon & Lawson. Ta conoci cu tin por lo menos 3 conseho pa pone e planta di WasteAway di B&L den funcionamento back. Nos sa cu nan a haci un investigacion caba riba peticion di e minister anterior y cu nan solucion lo no ta di e costoso ey. Esaki na bienestar di e bario y su habitantenan, y na bienestar di finanzas di Aruba. Por fabor para malgastamento di placa cu no tin!