Parlamentario Robert Candelaria (AVP): ‘Gobierno cu intencion di crea un departamento nobo den ministerio di enseñansa den pleno crisis’

Gobierno ta baha gastonan robes, e siman nos tras mi a trece dilanti caba cu tin hopi pregunta en cuanto con gobierno ta scoge su prioridadnan. Nos ta den un situacion financiero sumamente delicado door di Covid-19. Na e momentonan aki nos mester pa un y tur enfoke con pa pone e finansas publico na ordo y reduci gastonan innecesario mas lihe posibel. Aruba ta dependiente di ayudo financiero di Hulanda y nos ta mira cu e loke Hulanda ta spera ta pa nos gobierno reduci su gastonan pa asina por ricibi sosten financiero. Nos nunca por permiti nos mes spera yudansa financiero di Hulanda, siendo cu na cas mes nos gobierno mes ta sigui paga hendenan hopi placa sin cu esaki ta necesario of hasta inhustifica.

Locual Hulanda ta exigi di reduccion di gasto di gobierno ta afecta te hasta nos cuido medico. Aki mester baha gastonan di AZV cu 5 miyon florin pa luna, cu lo nifica 40 miyon florin menos e aña aki. Gobierno ta actualmente den pleno discusion cu algun sindicato riba diferente topico. Un di e manera cu gobierno kier cumpli cu Hulanda ta cu reduccion di sueldo di empleado publico. Gobierno a corta den bezoldiging di ambtenaaren, siendo cu nan a pidi pa bini cu un belasting temporal. Asina por sigui menciona hopi otro ehempel pa kico nos ta den un situacion social, economico y financiero hopi critico y Hulanda ta wak cada paso cu gobierno ta tuma. Pa e motibo aki gobierno mester ta hopi cauteloso con e ta gasta cada florin den e temporada aki y ta p,esey ta di opinion cu gobierno mester reevalua su proyectonan.

Laga nos evalua algun area awe unda gobierno mester seriamente evalua su prioridad y su maneho si e ta respeta su trahadonan y ta reconoce e delicadesa di e situacion financiero cu nos ta aden.

Contract lucrativo nobo pa huur di edificio

Nos a tuma nota cu fin di aña pasa gobierno a stop e huur pa DPL den e edificio di Apfa. Apfa ta e pensioenfonds di gobierno y ora cu paga huur na Apfa, gobierno ta invertiendo directamente den e pensioenfonds di nos ambtenaaren cu ta yuda mantene e fondonan saludabel. E suma cu gobierno tabata paga Apfa tur luna tabata ta Afl 21,450.00. E huur aki a wordo cancela pasobra gobierno kier a muda DPL pa e edificio na Engelandstraat 33 cu ta conoci como edificio di Andina Ice pa un suma di Afl 33,362.00 pa luna. E mudamento aki ta nifica un aumento di Afl 142,944.00 pa aña. Nos ta puntra dicon esaki ta necesario, mirando cu ta stop un huur na Apfa cu ta beneficia pensioenfonds di gobierno y gobierno ta regla contract cu su hendenan pa Afl 11,912.00 adicional pa luna. Nos ta comparti e documentonan pa pueblo mes mira e sumanan aki. Tur esaki tumando luga net awor cu gobierno, mas cu nunca mester busca solucion nan pa reduci su gasto nan. Pero ainda nos ta mira cu gabinete Wever-Croes ta sigui aumenta gastonan y beneficia hende memey di e crisis.

Mescos cu e edificio aki, tin mas ehempel di contract nan cu ta ser duna door di gobierno den e temporada aki cu nan mester ta bahando nan gasto. Tin hende cu a perde algun porciento di nan sueldo, pero tin cu a perde tur cos. Nos no por permiti cu nos gobierno ta sigui gasta placa innecesariamente asina den pleno crisis.

Creacion di departamento nobo den pleno crisis

Un otro ehempel cu nos ta cuestiona ta cu nos a tuma nota cu preparacion nan ta tumando luga pa un departamento nobo den e ministerio di enseñansa. Lo ta bon pa minister splica esaki, mirando cu ta trata di un departamento nobo cu casi 40 empleado. Nos ta puntra nos mes ta cuanto lo ta ambtenaaren nobo y cuanto ta bini di otro departamento cu minister di enseñansa ta bezig ta hef op contra e mandato di Parlamento. No por ta asina cu ora ta reduciendo salario di ambtenaaren pa yuda carga e situacion dificil cu nos tur ta aden, gobierno via un otro ruta ta funda departamento nan nobo cu hende nobo y sueldo halto.

Ta sigui paga helicopter y na mes momento ta corta sueldo

Mi a menciona recientemente cu e helicopter ta costa nos pueblo aproximadamente 200 mil florin pa luna, siendo cu nos por cera un deal cu Kustwacht pa nan helicopter haci e mes trabou pa mas tanto ora y tur esaki pa menos placa. Gobierno por haci hopi cu Afl 200 mil pa luna, na luga di sigui paga pa e helicopter. Awor cu gobierno mester negosha cu Hulanda pa haya pakete financiero di ayudo cual ta mara na condicion manera reduccion di salario di empleado publico pa yuda salba empresa nan y pa mantene hende den empleo, gobierno mester elimina tur gasto innecesario. No mester stop cu e servicio di helicopter, pero por stop cu e contract actual cu ta sumamente halto. Por haci e mes of mas trabou pa menos placa. Ban spera cu gobierno por demostra cu e ta pone nos pueblo prome cu orguyo personal.

Aki nos ta bolbe haci un apelacion riba gobierno pa reevalua prioridadnan financiero. Gobierno mester reevalua si awor ta momento pa mantene contract di e helicopter. Gobierno mester reevalua gastonan cu nan ta haciendo den Futura. Innovacion awor ta mas necesario cu nunca, pero e innovacion mester ta un cu ta na beneficio di tur ciudadano y no un grupito so.

Innovacion di gobierno no ta na beneficio di pueblo

Innovacion tin ora ta costa placa, pero e return on investment den innovacion mester wordo mira den su ayudo directo pa pueblo. Futura no por demostra esey awor. E beneficio di innovacion awor mester ta pa esnan cu tin e mas dificil den nos comunidad. Futura awor ta beneficia un grupito di gobierno so. Pueblo en general no ta gosa di dje awor. E ta costa pueblo placa so, cu awor ta necesario otro caminda.

Ta sigui paga coordinador y ta corta den pago di ambtenaar

Gobierno mester corta den su gastonan di coordinadornan. Gobernantenan mester di bon consehero pa nan por haci nan trabou, pero den e situacion cu nos ta, aki ta caminda pa cuminsa corta gasto. No por corta prome cerca e empleadonan publico cu tur nan añanan di servicio. No por corta nan entrada den un forma cu pa nan lo afecta nan negativamente sin corta den e gasto di coordinador. Si ambtenaaren ta pidi pa un belasting temporal na luga di mishi cu nan bezoldiging gobierno mester honra esaki. Gobierno lo gana door di paga menos sueldo, y e empleado ta gana pasobra e ta sinti cu a scucha y honra su peticion.

Nos ta convenci cu ora kier pidi Hulanda sosten financiero, gobierno mester por demostra cu el a haci su ehercicio prome pa wak unda por corta su gastonan. Nos no por ta pidi Hulanda placa, siendo cu na cas mes nos gobierno ta pagando hendenan hopi placa inhustamente. Nos mester por convence Hulanda cu nos ta un partner serio y confiabel den Reino. Despues di a scucha Knops y algun miembro di Tweede Kamer papia, nos mester mustra cu como pais nos a “shape up”. Si prome tabata importante pa evalua nos gastonan y baha unda por, awor e ehercicio aki a bira esencial. No tin espacio mas “business as usual”.