E cifra di 653 trahado local cu te aworaki a registra den Citgo Desk pa traha den e reapertura di e refineria, no a satisface e expectativa di director nobo di e compania estatal Refineria di Aruba (RdA), Alvin Koolman.
Sr. Koolman ta bisa cu e operacion di e refineria tin su retonan cu ne, pa tur e trabou di rehabilitacion di e infrastructura aki lo wordo haci corectamente. Un di nan ta e parti laboral di nos trahadonan Arubiano cu mester haya prioridad pa yena e cuponan di trabou cu e rehabilitacion y operacion di e refineria lo genera den e diferente funcion. Pa tal motibo RdA tambe ta forma parti di un comision hunto cu Citgo, Departamento di Labor y Dimas pa percura cu nos trahadonan local cu a nace na Aruba por haya trabou den Citgo.
Mas trahado local
E ehecutivo aki ta menciona cu ora cu Valero a cera na 2012 tabatin 595 pa 600 hende trahado directamente cu e compania Mericano aki. Ademas di 350 trahado indirecto cu tabata trahando cu contratistanan local. Pues e tabata un grupo di alrededor di mil hende trahando directo y indirectamente na Valero.
Sr. Koolman kende ta un profesional y experto tecnico riba materia di energia y no un politico, no sa e factor of factornan cu por a influencia cu te aworaki apenas algo mas cu 600 trahado local a aplica via Citgo Desk.
E ta bisa cu nan no sa exactamente cual ta e motibo cu eventualmente ta hungando un rol riba e asunto aki. “Por ta cu nan ta skeptico of por ta nan ta warda.” Sr. Koolman su expectativa tabata por lo menos 1200 pa 1300 hende mester a aplica caba pa nan por forma parti di e trabou den e refineria.
Banda di esey, tabatin 1200 pa 1300 trahadonan di afo contrata tempo cu Valero a termina na 2011-2012. “P’esey mi ta bisa cu apenas 600 hende ta mustra cu hopi hende ainda no a aplica.”
Sr. Koolman ta haci un apelacion pa nos hendenan cuminsa diligencia y aplica nan papel, pa asina e instancianan local por sa mas di e trahadonan local cu lo por bin na remarca na momento cu e contratistanan kier importa trahadonan.
Tambe director di RdA a yega di topa cu hopi trahadonan veterano di e refineria cu na edad di 60 aña nan ta kere cu nan no por aplica pa motibo di nan edad. Sr. Koolman a laga nan sa cu mientras cu nan ta salud y nan ta dispuesto pa traha, nan mag di aplica.
E periodo di awor te cu 3 aña ta uno special, ya cu e refineria tin mester di alrededor di 3 mil trahado. “Tur e hendenan aki ta esencial pa wordo uza.” Sr. Koolman ta afirma cu nan lo traha fuertemente pa garantisa cu nos trahadonan local ta esun cu lo haya prioridad pa wordo poni na pia di trabou.
Canalisacion di trahadonan
E ta splica cu gran parti di e 600 trahadonan cu Valero tabatin na final, tabata traha den mantencion. E grupo di trahado aki na comienso di e fase aki cu Citgo pa rehabilita e refineria, nan ta bay traha via contratista y despues poco poco ora cu e trabou di rehabilitacion ta cabando, nan por bay directamente cu Citgo. E contratistanan ta haya principalmente hendenan mecanico, civil, electronico, etc. pa traha den e refineria durante e trabou di rehabilitacion di e refineria.
Sr. Koolman ta bisa cu Citgo na comienso lo haya mas tanto hendenan administrativo pa yuda nan den henter e programa di prepara nan mesun hendenan of riba e parti di compras cu ta e parti operacional. Pero den e fase final nan lo haya hende di mantencion.
Na final di e fase aki lo keda alrededor di 800 pa 1000 trahado directo of indirecto trahando cu Citgo. El a laga sa cu e trahadonan di Valero cu a wordo transferi lo cuminsa traha cu Citgo directamente sin periodo di prueba. Mientras cu e trahadonan local cu lo traha cu Citgo directamente lo mester pasa e prome dos luna di prueba manera ta hinca den nos ley laboral.
