Ultimo tempo regularmente nos ta mira e fenomeno di referendum of plebiscito ta surgi. Ta trata di e consulta di pueblo den su totalidad, esnan cu tin derecho di vota mescos cu den eleccion, riba un tema cu un contesta cla di ‘Si’ of ‘No’.
Nos a presencia e sorpresa grandi di e ‘No’ cu a gana na Gran Britania, pa asina percura pa un salida forsa for di Union Europeo dentro di poco. Ainda no a caba di contempla y calcula tur consecuencia economico y financiero di e decision aki. Pero ta sigur cu den e caso aki e decision di sali di Union Europeo ta uno firme y ireversibel. No ta cuestion di aki un aña bay organisa otro cu ta deshaci di e decision tuma awor.
Den e aña aki tambe tabatin un referendum di otro caracter, na Hulanda, tocante e convenio di asociacion di Union Europeo, su 28 miembronan y republica di Ucrania. Esaki tabata un referendum di caracter corectivo solamente, facilita pa un ley special adopta na 2015, cu ta habri e posibilidad pa revoca un decision ya tuma, manera den e caso aki. E resultado negativo no ta para e decision tuma, pero ta haci cu e entrada na vigor di e ley aprobatorio lo mester pasa tur dos camara di parlamento Hulandes atrobe. E sorprendente NO a haci cu a bin bastante comentario negativo, ya cu e resultado di tur manera no tin influencia riba e acuerdonan aproba na nivel di Union Europeo. E pregunta cu ta keda en berdad ta pakico un consulta cu pueblo via urna, si e resultado no ta mara gobierno.
Den e caso di Colombia den e dianan cu a pasa, tabata trata di un tema di bastante impacto riba sociedad Colombiano. Den e caso aki, gobierno di presidente Santos a opta boluntariamente pa yama un plebiscito pa scucha opinion di pueblo Colombiano riba e acuerdo di paz cu gobierno a caba di firma cu e organisacion guerrillero FARC, despues di un guera sin tregua di como cincuenta aña. Tabata parce oportuno pa haci e consulta popular aki, pa kita e critica for di caminda, cu gobierno den algo asina importante no a duna participacion na opinion popular. Aki tambe un sorpresa grandi: e ‘No’ contra e acuerdo a gana cu un bentaha chikito. Yobida fuerte den un gran parti di e pais a obstaculisa e yegada di e votadonan, pero esey riba su mes no ta bisa cu e resultado lo tabata diferente si mas hende a bay vota.
Loke ta hunga un papel den e caso di Colombia ta cu gobierno tabata demasiado confia cu nan opinion riba e ‘deal’ cu FARC tabatin apoyo general, loke no tabata e caso manera a resulta awor. Talbes no a pensa cu e disgusto contra e movemento guerrillero cu tabata responsabel pa asina hopi atrocidad, lo tabata asina profundo despues di tanto decada di violencia. Ademas esnan cu ta desmobilisa como combatiente lo haya loke hopi famia Colombiano no tin: un vivienda, placa y ademas impunidad pa delitonan cometi. Naturalmente ta dificil den un proceso negocia, unda tur dos banda ta obliga di cede parti di nan posicion, pa exigi cu tur delito mester keda procesa hudicialmente. Pero den e caso aki esnan en contra di e acuerdo a haci bon uso di esaki pa lanta un protesta fuerte contra e acuerdo.
Di tur manera, mescos cu den e caso na Hulanda, e resultado na Colombia no por para e marcha di e asunto: ta inimaginabel cu gobierno Colombiano lo desisti di su intento pa trece paz despues di mita siglo di morto y desastre. Di otro banda, e organisacion guerrillero no tin alternativa tampoco ya cu nan no mester di conta mes cu apoyo di nan rumannan na Cuba, cu mester un normalisacion di relacion politico y economico riba henter continente, pa Cuba mes por tin un futuro. “The stakes are high” pa gobierno Colombiano, pero pa esnan na otro banda di e mesa sigur tambe. Lo mas probabel lo ta cu lo mester scucha deseo di oposicion politico, personifica pa ex-presidente Alvaro Uribe, cu ta haya cu e guerrilla a haya un salida demasiado generoso. Ta keda e realidad si cu gobierno Colombiano por dicidi di haci uzo di e autoridad pa honra e acuerdo, aceptando e consecuencianan politico den proximo eleccion.
Kico ta loke nos ta mira den e ehempelnan cu nos a resumi di consulta cu pueblo den e aña aki? Cu ta hopi importante pa sa na ki momento ta haci uzo di un instrumento asina. Ta zona masha bunita pa ‘laga pueblo dicidi’, pero esaki di berdad mester ta e caso tambe. Den e caso di e ‘Brexit’ e consecuencia irevocable ta salida di Union Europeo, cu bon of malo cu esey por significa. Den e otro casonan, nos ta mira un respuesta negativo, cu sin embargo no ta parce di ta bay tin tanto influencia riba e resultado final.
Sigur den e caso di e plebiscito na Colombia, e ‘No’ lo no para un acuerdo, talbes cu detayenan cambia den su contenido.
