Awe nivel 2 ta inicia cu mas flexibilidad: Shelter in place elimina, pero toque de queda ta sigui

Awe y te cu 31 di mei ta inicia e di dos nivel di e proceso di e normalidad nobo.

E nivel aki ta mas flexibel cu esun prome, ora cu dia 4 di mei e crisis team di Coronavirus/Covid-19 a dicidi di cuminsa flexibilisa gradualmente e medidanan cu a wordo introduci pa evita e contagio di e virus. Un di e medidanan clave cu a bin cune tabata e shelter in place cu a keda elimina cuminsando awe. Pero no e toque de queda, cu ainda ta vigente.

Minister di Turismo, Salubridad Publico y Deporte, Dangui Oduber a bisa un gradualmente nos ta bay bolbe na normalidad. Nan a bin cu cuater nivel, y despues cu nivel 1 a cuminsa, nan ta hopi satisfecho di e comportacion di comunidad. P’esey nan a dicidi di duna e siguiente paso pa e nivel 2, pero den un forma safe y sigur. Entrante awe nan a dicidi di elimina shelter in place, samenscholingsverbod y tambe e cantidad maximo di persona den establecimento.

E echo cu nan e elimina e medidanan anterior ta nifica cu tur hende mester tene cuenta cu e protocolnan y cu distanciamento social, bon higiena y prevencion.

Den e nivel aki scolnan cu ta cla por cuminsa. Logicamente cumpliendo cu e protocol y reglanan. No necesariamente tur scol mester habri, pero si dia 25 di mei, gobierno ta desea pa mayoria di scol of tur scol lo keda habri.

Entrante awe tur proyecto di construccion por continua. Shopping mall por habri bek. Celebracion di misa por tuma luga. Cinema tambe por opera entrante awe. Pero cada un di nan mester tene cuenta cu tur e protocolnan cu a wordo traha pa cada un di e sector aki.

Entrante awe tur e deporte di pafo y training por cuminsa cu excepcion di e deportenan di contacto. Tampoco no ta permiti competencia deportivo.

E mandatario a indica cu pa e prome mita di nivel 2, entrante dialuna 25 di mei, nan ta spera cu tur scol lo wordo habri. Igualmente crèche y Trai Merdia lo wordo habri tambe. Tambe restaurantnan pafo lo por habri. El a bisa cu nan ta considera como restaurant un establecimento cu ta ofrece cuminda na un mesa pa nan clientenan. Pues e ta aclaria cu bar no ta bay habri y tampoco nan no duna oportunidad pa barnan cu ta ofrece snacknan por habri. E flexibilidad aki ta vigente pa restaurant y solamente pafo. Pero nan mester cumpli cu un programa di certificacion cu ATA hunto cu DVG ta preparando. Awe nan lo duna mas informacion riba e programa aki.

Oduber a laga sa cu loke no ta habri ainda ta e luganan cu ta ofrece masashi, SPA, bar, night club y casino. Eventonan publico tampoco no lo por continua por lo pronto.

Nan ta bezig cu aeropuerto cu tin nan protocol cla. Gobierno ta desea di habri nos frontera tentativamente entre 15 di juni y 1 di juli. El a bisa cu esaki ta depende di e comportacion di nos comunidad. Den proximo conferencia nan lo anuncia kico ta e proximo nivel cu gobierno ta bay duna aprobacion pa habri.