Tormenta tropical Arthur a forma dilanti costa di Florida diasabra pasa, haciendo esaki e di seis tormenta cu ta desaroya promer cu e temporada oficial di horcan riba Atlantico cuminsa dia 1 di juni.
Centro di e tormenta tabata situa diasabra 11:00 pm na 305 kilometro norteste di Cape Canaveral, Florida, segun US National Hurricane Centre na Miami. Arthur tin biento sosteni di 40 miya pa ora (65 km pa ora) y ta moviendo den direccion nort-norteste cu 13 miya pa ora di velocidad (20 km pa ora).
Vigilancia pa tormenta tropical ta na vigor pa parti di costa di North Carolina. Segun pronostico Arthur lo keda leu di costa di Florida y Georgia y lo ta acercando costa di North Carolina riba awe, dialuna, loke por percura pa algun awacero.
Mientras cu por tin un componente di awa cayente pa via di cambio di clima den otro tormenta den e periodo promer cu juni, Arthur ta un sistema subtropical diferente compara cu e tormentanan tradicional cu ta haya nomber y e awa cu e ta hiba ta mas friu cu loke normalmente ta considera necesario pa desaroya tormenta tropical, segun Phil Klotzbach, investigador di horcan di Colorado State University.
Hopi di e tormentanan aki ‘fuera di temporada’ ta formacionnan debil cu meteorologonan por mira awor danki na satelite y mihor tecnologia, pero cu antes lo a keda sin detecta, segun Klotzbach.
Mientras tanto na Bahamas ta sigui e acontecimentonan cu interes, ya cu e islanan Grand Bahama y Abaco ta lidia ainda cu e consecuencianan di e horcan Dorian, di categoria 5, di aña pasa. Funcionarionan a bisa cu nan ta prepara pa evacua pacientnan di Abaco cu ainda ta hospeda den tent despues cu e horcan a haci daño grandi na hospital di e isla.
