Vigilantenan di privacidad ta bisa cu e app di video popular, TikTok ta viola ley di privacidad di mucha, y ta poniendo muchanan den riesgo.
Un coalicion di 20 grupo, incluyendo Campaign for a Commercial-Free Childhood y e Center for Digital Democracy a entrega un keho diahuebs cu e Federal Trade Commission (FTC) bisando cu TikTok ta colectando informacion personal di muchanan bou 13 aña di edad sin permiso di nan mayornan.
TikTok, propiedad di e compania Chines, ByteDance a explota den popularidad cerca hendenan jong danki na su vibe dibertido y facilidad di uso. Na mes momento, a genera scrutinio di oficialnan Mericano preocupa tocante riesgonan pa siguridad nacional pa motibo di su doño Chines y su popularidad cu mucha.
TikTok a paga un multa di $5.7 miyon na FTC na 2019 tocante coleccion di informacion personal di muchanan bou 13 aña di edad, un violacion di e Children’s Online Privacy Protection Act federal. E compania a cambia su app cu un modo restringi pa usuarionan mas jong.
Pero e grupo di privacidad ta bisa cu ta facil pa muchanan usa TikTok sin permiso di mayornan. Muchanan por registra cu un fecha di nacemento falso pa usa e version adulto completo di e app, ‘poniendo nan den riesgo pa usonan comercial di data di TikTok, y contacto inapropia di adulto’, e gruponan a bisa den un comunicado di prensa conhunto.
TikTok ta usa e data cu ta colecta di usuarionan, manera ubicacion, kico ta den nan mensahe y ki video nan ta mira, pa haya sa ki video nobo pa mustra nan y pa aviso enfoca (targeted advertising).
E gruponan di privacidad a pidi FTC pa investiga y multa TikTok. E comision a bisa cu a ricibi e keho pero no tabatin comentario riba esaki. Den un declaracion via email, TikTok a bisa cu ta tuma privacidad na serio y ta comprometi pa sigura cu e app ta safe y dibertido pa su usuarionan.
