Cantidad di hende cu a cuminsa prepara su vakantie familiar cu tempo a mira cu lamentablemente esaki a bira dificil actualmente pa e pandemia di e coronavirus/Covid-19.
E crisis actual cu mundo henter ta pasando aden pa causa di coronavirus/Covid-19 a produci un impacto fuerte den industria aeronautico y crucero global. Esaki ta wordo refleha den e cantidad di cancelacion cu a wordo registra, despues cu cantidad di paisnan a dicidi di cera nan frontera, entre nan Aruba, pa evita e importacion di e virus y contene su contagio localmente
Mary Spellen di e agencia di biahe Discovery Travel N.V a declara na Bon Dia Aruba cu e hendenan ta programa nan vakantie cu tempo. Sinembargo mirando e situacion actual, hendenan ta abstene di biaha y ta cancela nan reservacion. Pero e problema awor ta sinta cu tin companianan aereo cu no ta haci refund of debolbe e placa. Locual nan ta haci ta extende e ticket pa e persona por biaha den cualkier otro periodo. Algun aerolinea ta dunado un aña mas pa nan por biaha.
Igualmente, el a laga sa, cu den principio no solamente e companianan aereo, pero tambe esunnan di crucero ta permiti pa esnan cu a yega reserva nan servicio, prome cu e crisis di Covid-19 a cuminsa, ta haya un voucher for di e compania di crucero cu nan por haci uzo di dje denter di dos aña.
Mayoria di e companianan di crucero a opta pa haci esey. Sinembargo tin companianan di crucero cu dependiendo di e ruta cu nan ta duna bo refund. “Cierto crucero so, dependiendo di e tipo di tarifa cu bo a cumpra,” el a bisa durante un entrevista cu e matutino aki.
El a conclui cu referiendo na e companianan aereo, mayoria a dicidi di no haci refund, sino pa extende e reservacion pa otro fecha.
