Banco Central a inclui den su encuesta encuanto perspectiva pa empresa na Aruba tambe e temanan di Empleo y Salario, y Inversion y financiamento. Un relato di esakinan.

Empleo y Salario.
Den promer trimester di 2020 e porcentahe di compania encuesta cu a reporta ‘sin cambio’ den e cantidad di empleado a aumenta cu 15.4 punto di porciento, di 41.4 porciento den ultimo trimester di 2019 pa 56.8 porciento den e trimester aki. Mientras tanto, e porcentahe di condicion di ‘mehoracion’ y ‘empeoramento’ a contrae cu 13.6 punto di porciento, y 1.8 punto di porciento, respectivamente. Cu referencia na salario averahe durante promer trimester 2020, e porcentahe di compania encuesta cu a reporta ‘sin cambio’ den e costo averahe di salario a aumenta cu 21.3 punto di porciento, di 25.0 porciento den e ultimo trimester di 2019 te 46.3 porciento den e trimester aki. Mientras tanto, e porcentahe cu ta registra ‘mehoracion’ a contrae cu 21.9 porciento (mira chart 2).

Inversion y financiamento.
Pa loke ta actividad di inversion y financiamento durante e promer trimester di 2020, e companianan encuesta a nota un deterioro di inversion, e porcentahe di compania encuesta cu a indica condicion ‘empeora’ di inversion a aumenta cu 5.8 punto di porciento, di 31.0 porciento den ultimo trimester di 2019 te na .8 porciento den e trimester revisa aki. E porcentahe di compania cu a señala ‘mehoracion’ den inversion a cay cu 13.1 punto di porciento, mientras esnan cu a reporta ‘sin cambio’ a aumenta cu 7.3 punto di porciento. Pa loke ta actividad di inversion a corto plazo, a expresa sentimento similar. Den e promer trimester di 2020, mayoria di e empresanan encuesta (66.3 porciento) ta premira condicion empeorando durante e proximo 6 luna. Esnan reportando ‘sin cambio’ a corto plazo den inversion a cay cu 28.1 punto di porciento, di 58.6 porciento den ultimo trimester 2019 te na 30.5 porciento den e trimester bao revision actual. Na mesun momento, a porcentahe di empresa encuesta cu ta indica ‘mehoracion’ a cay cu 21.0 punto di porciento. Durante e trimester revisa, e porcentahe di encuestado cu plan di inversion den proximo 12 luna a baha cu 4.7 punto di porciento, te 63.2 porciento den e promer trimester di 2020. Di acuerdo cu 35 porciento di e empresanan encuesta, e condicionnan pa haya financiamento pa empresa a bira mas dificil durante e promer trimester di 2020. Esnan cu a indica cu e condicionnan a keda mescos a baha cu 15.4 punto di porciento te 63.2 porciento den e trimester revisa aki. (mira chart 3).