Nos no sa ki acuerdo Aruba tin cu forsanan sobrenatural, pero atrobe horcan ta pasa cerca, pero no ta afecta nos directamente. Fuera di un poco lama bruto y algo di awasero, tur cos a keda trankil. Hasta e biento a keda menos cu riba un bon dia di hisa flie na april. Cu un smile na e cancion di Doble R, por conclui cu e preparacion tabata exagera? En general no, principalmente pasobra bo no por prepara 50% pa loke ta bin, mientras bo no sa kico exactamente e lo ta. Horcan ta loke e ta pasobra e ta traicionero, por cambia di rumbo na ultimo ora y talbes e ora ey bo preparacion no ta bay ta loke e mester ta pasobra no tin tempo mas. Den e sentido ey sigur no ta critica ningun autoridad pa cuminsa prepara y adverti tur hende.
E problema sin embargo ta sinta den otro decisionnan cu a tuma na caminda cu no ta contribui na siguridad di pueblo. Cu ta dicidi di cera tur scol, por comprende ya cu e personal tabatin un dia di ATV. Na e problema cu e dianan di ATV mes ta ocasiona den enseñansa, nos lo dedica atencion na otro momento. En todo caso, cu e scolnan cera ya caba a kita un parti importante di e trafico mainta y merdia for di circulacion. Ilogico ta cu tur departamento di gobierno mester cera, mientras no tabatin suficiente motibo pa haci esaki. Si bin menos publico cu mester atencion, tin yen di otro trabao pa haci den tur oficina. Y si na un dado momento tabata anticipa cu e situacion lo a bira mas grave, lo tabatin suficiente tempo pa cera oficina of no habri nan mes.
Pero, nunca tabatin un momento di indicacion cu e tormenta lo tabata bin linea recta pa Aruba. Semper e indicacion a keda di un tormenta, cu a bira horcan categoria 1, esun mas liviano, cu rumbo como 200 km panort di Aruba. Sin embargo, a lanta un ambiente di ‘fiebre’ y ansiedad cu no tabata hustifica. Y tabatin cierto paso cu a contribui na esey. Kico pensa por ehemplo di e suspension di transporte di bus? Den un situacion di emergencia loke ta lo ultimo pa para ta transporte publico y pakico? Pasobra esey ta e ultimo posibilidad cu tin pa hende logra yega nan cas of trabao na un manera sigur!
Ora awa ta asina halto cu na cierto luga auto di luho no por pasa, ta bus ta e medio pa move hende. Te ultimo momento, y e prome pa cuminsa core pareu cu e peligro principal no t’ey mas. Un pregunta masha simpel: con ayera, diabierna, tur e trahadonan na e hotelnan cu ta move cu bus mester a yega nan trabao, si di antemano a dicidi cu e dia ey no tin transporte? Pasobra esnan den servicio publico por pensa cu na cualkier momento ta para trabao, pero nos economia ta basa riba un sector di 24/7/365!
Aki ta otro regla ta manda. No tabatin un motibo di gravedad pa ordena evacuacion y aviso na huesped pa miho no bin Aruba pa nan vacacion, asina ta cu tur hotel tabatin nan operacion ta core normal. Hasta den un situacion mas dificil e personal cu por ehemplo mester a drenta trabao mainta tempran, mester por conta cu transporte publico, mientras cu ningun momento a yega un situacion cu lo a hustifica su ausencia.
Mas incomprendibel ta e yamada na sector priva pa cera tur cos, mientras cu na e momento ey no tabatin ningun situacion di emergencia cu tabata rekeri esey. No mester lubida cu nos economia no ta prestando 100% y cada dia di trabao y benta ta conta.
Tin mas consideracion pa haci den e situacion aki. Esey ta e pregunta: con bon nos ta prepara pa un calamidad mayor, un horcan cu no ta pasa cerca, pero riba nos? Nos a yega di pensa riba e cantidad di dak, construi desde añanan cincuenta di siglo pasa, cu no ta resisti biento di 200km pa ora of mas? Nos a yega di pensa cu den un calamidad asina nos no tin shelter pa tanto hende? Nos a realisa cu e hendenan ey, manera un persona a reacciona riba Facebook, no sa mes unda tin shelter pasobra e maneho ta aparentemente cu ta despues di e calamidad ta anuncia unda bo por bay? Y si bo perde bo dak den prome ora di horcan y ta tarda seis ora pa e caba di pasa, unda bo mester keda mientras tanto? Ta e situacionnan aki ta costa bida di hende!
Aruba por keda alivia atrobe, pasobra ta parce cu un biaha mas tabatin un man magico cu ta duna nos proteccion. Pero, e man ey lo yuda esnan cu ta yuda nan mes, y esey no ta loke nos ta haci. Nos ta causa un monton di conmocion y emocion, pero nos no ta mustra ordena y planifica na unda esey ta conta. No mester warda e siguiente ocasion aparece pa nos cuminsa core cabes di gay atrobe.
