Tesla a demanda condado di Alameda diasabra den un esfuerso pa habri back su fabrica di auto na Fremont, California, un capitulo nobo den e lucha largo di hefe ehecutivo Elon Musk tocante restriccionnan imponi pa combati pandemia di coronavirus. Tesla tambe lo retira su sede for di California y stop di fabrica auto na e planta completamente, el a bisa. “Mi no ta haci wega”, Musk a tweet.
“E condado ta haciendo reglanan cu directamente ta contradeci y socava e politica anuncia pa gobernador den su orden”, Tesla a bisa den su demanda contra e condado. “E orden di e condado mester wordo declara invalido y sin efecto legal.”
Tesla a cera e planta na Fremont maart ultimo mientras e condado y estado a busca di combati transmision di COVID-19, e malesa respiratorio causa pa e coronavirus. Gobernador di California, Gavin Newsom a anuncia plan pa cuminsa permiti algun negoshi habri bek cuminsando diabierna, un mobida cu Musk a aplaudi. Pero condado di Alameda, unda Fremont ta ubica, supuestamente a bisa cu Tesla no tin permiso pa cuminsa habri e panta bek.
Autoridadnan di salud di condado di Alameda ta trahando directamente cu Tesla riba un plan pa habri e fabrica bek di forma sigur, e condado a bisa den un declaracion diasabra. “E team na Tesla tabata responde na nos guia y recomendacion, y nos ta anticipa yega na un acuerdo riba un plan di siguridad apropia pronto”, e condado a bisa. Hende y negoshinan a haci sacrificio pa salba bida, y ‘nos mester sigui traha hunto pa e sacrificionan ey no ta desperdicia’.
E disputa ta demostra prioridadnan den conflicto, den e esfuerso pa combati e pandemia: cuminsa habri negoshinan ta permiti mas hende bay traha, pero suavisando restriccionnan di shelter in place ta presenta riesgonan na salubridad publico.
Musk, kende a expresa contra locual el a yama ‘panico’ di coronavirus, no ta contento tocante e restriccionnan riba e fabrica di vehiculo electrico di su compania. Tesla a recien cuminsa produci si Model Y, un mescla basa riba e sedan Model 3 anterior.
“Tesla awo lo move su sede y programa den futuro na Texas/Nevada inmediatamente. Si nos tene actividad di fabricacion na Fremont mes, lo depende riba con ta trata Tesla den futuro. Tesla ta e unico fabricante di auto cu ta keda na CA.”
Fabrica di Tesla por a habri 18 di mei.
Condado di Alameda tabata trahando riba un plan pa permiti Tesla habri e fabrica dia 18 di mei, un oficial di condado, Scott Haggerty a bisa The New York Times. Pero un ehecutivo di Tesla a bis’e diahuebs cu Musk tabata pensando di demanda, y esey a reduci su combersacionnan cu Tesla.
E oficial di Salud critica pa Musk ta Dr. Erica Pan, oficial di Salud interino na e Division di Control y Prevencion di Malesa Infeccioso na condado di Alameda. Pan no a duna comentario.
Tesla a detaya su plan pa cuminsa operacion di fabrica di nobo den un plan di ‘bek na trabou’ di 38 pagina publica diasabra riba su website. “Nos plan di reinicio ta resultado di lunanan di plan cuidadoso y preparacion. Tabata modela riba e plan comprensivo cu nos a establece na nos Gigafabrica na Shanghai, cu a mira operacionnan suave y saludabel durante ultimo tres luna”, Tesla a bisa. “E posicion di e condado no ta laga nos opcion sino accion legal pa sigura cu Tesla y su empleadonan por bolbe trabou.”
E politica di California pa habri negoshi bek ta un plan di cuatro etapa. “Awo nos ta den inicio di Etapa 2, cu retail (entrega y pick up unicamente, di logistica relaciona, fabrica y negoshi esencial por habri, pero tin un provision pa condadonan move mas lihe si nan ta cumpli cu criterio di preparacion.
Condado di Alameda y seis otro condado den area di San Francisco Bay a bisa diahuebs cu nan ta trahando ‘pa haya manera pa habri mas negoshi y actividad di forma sigur’.
Alcalde di Fremont, Lily Mei a ofrece sosten na Tesla. El a bisa cu e ta preocupa tocante implicacion potencial riba economia regional, agregando cu hopi negoshi esencial a demostra cu por opera exitosamente usando practicanan di siguridad y distanciamento social estricto. Pues lo mester ta posible cu fabricanan tambe.
Sede actual di Tesla ta na Palo Alto, California. “Mi lo ta hopi triste y decepciona si Tesla bandona Ciudad di Palo Alto, y mi ta cla pa yuda”, alcalde di Palo Alto, Adrian Fine a tweet diasabra.
