DOW lo bay traha nan conseho riba cual ta e prioridadnan riba tereno di infrastructura. Esaki mirando cu nan presupuesto 2020 recientemente aproba ta hopi limita debi na e reto financiero cu gobierno di Aruba ta pasando aden prome y despues di e crisis di coronavirus/Covid-19
Minister di Infrastructura, Marisol Lopez-Tromp a declara na Bon Dia Aruba cu e ta wardando riba e dia cu e conseho aki lo bin cla. Den dje, DOW lo evalua e echo cu tin un crisis cu por trece cambionan riba maneho, pensamento, situacion y prioridadnan nobo, el a bisa. Pero tambe e aspecto financiero ta hunga un rol. Sinembargo e mandatario a trece como ehempel cu proyecto di careteranan, entre otro nan lo tin cierto prioridad.
Proyectonan di construccion.
Igualmente despues cu gobierno a bin cu e prome nivel di flexibilisacion di shelter in place cu ta inclui e sector construccion, e mandatario a laga sa cu e proyecto hotelero The Secret Baby Beach Resort ta cay entre esunnan cu a cuminsa caba. Kiermen e no ta un proyecto nobo ya cu ex minister Otmar Oduber a inicia cu e proyecto aki prome cu el a baha pa fin di aña pasa.
El a indica cu tur proyecto cu tabata andando y cu ta cumpli cu e rekisitonan stipula y condicion cu a wordo poni recientemente pa evita mas caso positivo di Covid-19. Den e caso aki e proyecto hotelero aki den e area di Seroe Colorado no ta un excepcion tampoco.
