Manera a keda conoci algun dia pasa door di un medio di comunicacion social, Cuerpo Policial di Aruba tabata evalua uso di señal di celular pa midi movecion pa cu COVID-19, manera Corsou ta haci pa determina si comunidad ta cumpli cu normanan di toque de queda of shelter in place.
Tocante esaki, alto comisario di Cuerpo di Polis, Vanessa Tjon Kock a expresa durante conferencia di dialuna ultimo cu na Corsou e tecnologia y medionan cu ta usa ta distinto y e parti di celular a bin dilanti durante un reunion.
Den cuadro aki, Bon Dia Aruba a puntra alto comisario Tjon Kock diaranson ultimo si esaki por sucede na Aruba, mirando e tecnologia cu Setar no tin disponibel; ademas con nan lo pensa haci esaki sin viola derecho di privacidad cu ta fundamental di tur ciudadano.
Tjon Kock a sigura cu efectivamente esaki ta berdad. “Di ningun manera nos lo por introduci algo sin tene cuenta cu e leynan existente.” El a señala cu esaki ta un punto cu ta keda cu atencion, pero aworaki nan no por ehecuta, pa motibo cu mester tene cuenta cu diferente criterio y leynan existente cu Aruba tin.
Pa splica mas precies kico esaki ta nifica, ta existi dos metodo pa identifica e ubicacion di usuarionan di telefon celular. E prome di nan ta via Geo-Location, cu ta usa señal di GPS pa determina e ubicacion cu hopi precision, pero cualkier persona por paga su Geo-Location y no tin señal mas, loke ta causa cu no por ubica e persona. Di dos metodo ta menos precies y Setar no tin e capacidad ni infrastructura pa haci esaki, cu ta yama ‘Cell Tower Triangulation’. Esaki ta funciona a base di triangula cu minimo tres Cell Sites Tower y a base di un calculacion, por haya sa aproximadamente na unda e telefon ta.
