Den ultimo dianan, e noticia cu Arubahuis a haya 9 miyon pa su renobacion a traves di presupuesto di DOW a causa hopi conmocion, pa motibo cu comunidad a trece dilanti cu esaki no ta un inversion cu tin un prioridad na e momentonan aki.
Tocante esaki, director di DOW, Marlon Croes a trece dilanti cu esaki ta un deseo cu a wordo pidi un tempo pasa pa e infrastructura di e luga por wordo renoba. Nan a haci un evaluacion riba e proyecto aki pa duna un suma di loke e renobacion lo bay costa y busca e presupuesto pa cuminsa cu e trabou di diseño y despues bay pa un proceso di destaho publico.
“Esey no kiermen cu e trabou ta cla pa cuminsa”, Croes a aclaria. Asina tambe, el a splica cu e proyecto tambe tin henter un lista di mantencion cu mester tuma luga regularmente.
Asina mes, el a afirma cu e presupuesto di DOW a wordo aproba siman pasa. Den esaki tin un lista di 30 localidad ubica pa construi polis drumi, cu tin hopi demanda y cu lo bay busca aprobacion y busca e fondonan pa cuminsa haci esaki. Pa motibo cu ta un prioridad pa garantisa e siguridad di muchanan cu ta rond di scolnan of crèche. Banda di esey den barionan lo analisa unda tin areanan cu ta trece problemanan di siguridad pa muchanan por hunga riba caya of cana liber.
