Un gran mayoria di e trahadonan di sector hotelero y sector Horeca no a aplica pa e ayudo di FASE ofreci pa gobierno. Sino cu mas bien nan ta bin hayando parti di nan pago di salario, pero toch sindicato FTA ta bin hayando algun keto di esunnan cu a registra pa FASE, y ainda nan no a wordo beneficia cune.
Presidente di FTA, Hubert Dirksz a declara na Bon Dia Aruba cu e crisis actual di coronavirus/Covid-19 a ocasiona un impacto fuerte pa nos industria turistico y tambe pa sector di Horeca. Esaki a trece cune cu un gran cantidad di trahadonan a wordo manda cas. A pesar di esaki e sindicalista a declara cu mayoria di e trahado a mantene un cierto porcentahe di pago di nan salario. Ya sea cu e ta un suma fiho of un porcentahe.
Sinembargo un of dos compania ta ricibi FASE. Pero e no por bisa specificamente cual ta e companianan aki. Tampoco si nan a hay’e caba, of si nan no a haya e ayudo aki ofreci pa gobierno. FTA a haci un siguimento cu e comision cu ta encarga cu FASE, y e ta haya cu ta keda na e comision aki pa confirma esaki.
Loke ki ta keda un punto di atencion pa FTA ta e parti di loon-subsidie of subsidio salarial. Esaki ta debi cu e mesun compania cu no a dicidi pa paga e trahado, y mand’e cas, y el a bay aplica pa FASE, e mesun persona aki ta hayando e derecho pa subsidio salarial. E sindicalista a splica cu si nan ta haya e subsidio salarial, e ayudo di FASE ta cay. Pero loon-subsidie y FASE riba su mes tin basta exigencia.
FTA tin conocemento di casonan -no cerca nan miembronan- di hopi trahado cu a bay aplica pa FASE, y nan no por hay’e pa diferente motibo. Sea entre otronan cu e formulario a wordo mal yena. Pero tambe tin caso cu e ta wordo bon yena, pero e candidatonan no ta cumpli cu e exigencianan di FASE.
El a señala cu pa e loon-subsidie tambe lo bay presenta casonan asina, debi cu mester cumpli cu e exigencianan. “Si no cumpli cune, automaticamente e no lo haya e placa destina pa e trahado,” el a declara.
Ainda FTA no por bin cu un inventarisacion di nan miembronan cu ta traha den e industria turistico y cu nan a keda sin trabao. Sindicalista Dirksz a bisa cu masha poco di nan ta desemplea den sentido cu a perde trabao. Pero si tur di e sector hotelero ta na cas y casi un shen porciento di e sector Horeca tambe, pero manteniendo un pago minimo.
