Cu su 57 aña di edad, Tom Cruise kier filma e prome pelicula di accion den espacio. Segun Deadline, e actor ta trahando riba e proyecto cinematografico ambicioso aki den asociacion di NASA, y cu Elon Musk, doño di Tesla y compania aeroespacial SpaceX.

Segun informacion di Deadline, e propuesta ta ainda den etapa inicial y ainda no ta conta cu sosten di ningun estudio cinematografico. Ademas, ta aclaria cu e pelicula no lo ta e version nobo di e popular frankisia ‘Mision: Imposible’, sino un proyecto diferente.

Deadline ta sigura cu Cruise, SpaceX y NASA lo join den e ‘prome pelicula narativa – un aventura di accion – cu lo wordo filma den espacio exterior.”

Cruise ta nenga di usa ‘double’ den e escenanan di accion mas extremo di su peliculanan. Despues di escala Burj Khalifa – e edificio mas halto di mundo – den ‘Mision: Imposibel – Protocol Fantasma’ of di mara su mes pafo di un avion durante despegue den ‘Nacion Secreto’, awo e actor kier bay -literalmente- den espacio.

“Nunca tabatin un actor cu ta pone su mes den riesgo asina sigui manera Tom Cruise pa logra e secuencianan di accion mas realista posibel. Si e tin exito filmando un proyecto den e astronave espacial di Musk, e lo figura den buki di record di Hollywood”, segun e noticia di Deadline cu varios medio di comunicacion rond mundo a reproduci.

Filma den gravedad cero lo ta un reto nobo pa Cruise, conoci pa haci tur escena di accion sin double, maske teoricamente e lo conta cu ayudo di NASA y SpaceX, cu dia 27 di mei proximo lo realisa e prome biahe cu tripulacion for di Merca.

E actor, nomina na premio Oscar, ta custuma di graba secuencianan di riesgo y ta durf di haci tur cos den cada un di su trabounan riba pantaya grandi. Sinembargo, e strea di Hollywood ya a yega di ricibi algun susto. Durante grabacion di ‘Mision: Imposibel- Fallout’ e mester a graba un escena den cual su personahe tabata bula entre dos edificio, na momento cu el a sufri un caida y a kibra su enkel. Despues di un descanso di dos siman, el a bolbe accion.

Prome cu biaha na espacio. Cruise lo mester termina di graba e di shete y ocho capitulo di e saga ‘Mision Imposibel’. Como gran parti di industria di Hollywood, e actor a sufri cu e paro di tur filmacion como contesta na e pandemia di coronavirus, COVID-19. De hecho, a suspende filmacion di ‘Mision: Imposibel 7’ na februari, tempo cu e tabata filmando na Venecia, Italia, y tanto su estreno como esun di e di ocho pelicula mester a keda posponi na fin di 2021 y fin di 2022 respectivamente.

Ademas, e actor tin pendiente e estreno di ‘Top Gun: Maverick’, secuela di e clasico di 1986. E pelicula anticipa lo mester a tin su lansamento mundial dia 24 di juni proximo, pero despues di e crisis di pandemia, a pospone su estreno te dia 23 di december proximo.