E fenomeno localisa den lama pariba di Antia Menor cu ta inclui e islanan di Grenada, St. Lucia, Trinidad & Tobago, Antigua y Barbado, ta moviendo den nos direccion treciendo recuerdonan nada grato di horcan Ivan 12 aña pasa.
Ex director di Bureau Rampen Bestrijding, Sr. Bibi Arends a declara na Bon Dia Aruba, cu semper nos poblacion mester ta bon prepara durante e temporada di horcan. Sinembargo e ta haya cu e pronostico cu a wordo duna inicialmente a spanta hopi hende, ya cu nan a uza Aruba como referencia, y no cu e ta bay dal Aruba, sino pa mustra con directo e ta biniendo abou pa drenta Caribe.
Tin diferente factor cu ta den wega prome cu un horcan ta wordo forma. Prome e ta un depresion tropical, despues un tormenta tropical pa finalmente bira un horcan. Na 2004 ora cu horcan Ivan a haci su presencia den Caribe, e tabata na Grenada caba y el a drenta Trinidad como un horcan categoria 4. E fenomeno cu actualmente ta wordo forma ta apenas un depresion tropical. “E ta un comparacion cu nos por bisa cu e no ta asina serio manera un Ivan di 2004”, el a declara.
Pero den e mesun rosea cu Sr. Arends a pidi pa tur hende ta semper bon prepara, ya cu nos a drenta den temporada di horcan, y tur cos por pasa. “Nos no mester desafia naturalesa. Bo no sa kico e cos aki ta bay haci. E no ta mustra asina serio, manera a anticipa den e prome pronostico”, el a bisa. Mester sigui monitor con e fenomeno aki ta desaroya, ya cu e situacion ta cambia.
Depresion tropical
Normalmente ta tres dia prome cu un fenomeno asina yega un pais, e pais ta bay den un aviso y si e ta bira mas serio e ta bay den un alerta. E ta un procedura comun y standard. “Nan no ta duna un aviso of alerta prome cu tres dia”, el a bisa. Actualmente no tin niun aviso pa Aruba.
Ayera tardi el a observa cu henter e sistema ta mustra un area di presion abou cu no tin ni e balor di un depresion tropical. El a splica cu depresion tropical ta ora cu e tin un structura, e ta miho organisa y e ta draai. “E no ta draai ainda, e ta un area di disturbio y tambe el a paralisa”, el a bisa.
Sr. Arends cu ta duna conseho riba e tereno aki a laga sa cu varios hotel y empresa a tuma contacto cu ne riba e situacion aki. El a splica cu actualmente e disturbio aki ta paralisa y no ta moviendo bon, locual ta haci cu e ta gastando su energia na e sitio mes y e no por desaroya y bira mas fuerte actualmente.
Ta wordo pronostica cu ayera nochi e ta converti den un depresion tropical. Pero e no ta asina avansa manera a wordo pronostica den prome instancia. Si e ta yega Aruba mes –segun Sr. Arends- cos cu e no ta kere, nos lo sinti su presencia diadomingo manera e situacion ta actualmente.
El a bisa cu actualmente den e temporada di horcan aki specialmente entre mita di september y mita di october, lama den Atlantico ta mas cayente y ideal pa formacion di horcan. E ta un situacion super bon pa un fenomeno aki pasobra e ta duna e posibilidad pa crece y bira mas grandi. Pero e ta algo cu no ta tumando luga ainda, ya e fenomeno cu nos tin actualmente su structura no ta organisa of forma. Ora cu e ta cuminsa bin abou den lama Atlantico, e lo por haya forsa ya cu e temperatura di lama ta energia pa horcan.
Sinembargo ora cu e ta topa cu e parti continental di Sur America e ta debilita y perde forsa, ya cu un “horcan no ta pa tera”, segun Sr. Arends.
