Departamento di Aduana kier recorda tur persona biahando pa exterior y cu lo bay haci compras di articulonan pa uzo personal of negoshi pa tene cuenta cu na yegada na Aruba tin cu declara e mercancia debidamente na Aduana. Pa algun producto pa uzo personal te na cierto balor ta posibel pa importa sin cu ta necesario pa paga invoerrechten.
Na mesun momento Departamento di Aduana ta recorda biaheronan y importadornan di carga pa ta consciente di e reglanan prescribi den diferente ley encuanto importacion of exportacion di mercancia of transportacion di mercancia for di Aruba cu ta rekeri un permiso y/of cu ta prohibi. Ehempel di mercancianan prohibi ta armanan (di candela), droga, remedi, mata, bestia, carni of preparacionnan traha di carni.
Den caso cu e biahero/ importador of exportado di carga no por presenta un permiso, Departamento di Aduana lo wanta e mercancia y esaki lo por tin como consecuencia cu e biahero/importador of exportado di carga ta haya un multa y/of lo por wordo deteni. Alabes e mercancia lo por wordo destrui.
Departamento di Aduana ta haci un suplica na un y tur pa tuma bon nota di e aviso aki pa asina evita cualkier inconveniencia cu por surgi durante control di Aduana.
