For di algun siman atras Aruba Tourism Authority a cuminsa traha riba diferente aspecto referente e asina yama “new normal”. No solamente Aruba, pero mundo henter ta desaroyando diferente programa y protocol pa asina por ta prepara na momento cu fronteranan habri.
Un fecha exacto no ta conoci ainda debi cu esaki ta depende di varios factor, pero si a forma un comision cu tin como meta pa crea un sistema basa riba protocolnan y standard pa diferente sectornan cual lo mester adheri na dje. Meta ta pa esaki ta cla den e proximo dianan, teniendo na cuenta cu na es momento aki Aruba ta mustra di ta habri entrante prome di juni. Esaki por cambia naturalmente. Departamento di salud publico (DVG) como tambe Ministerio di Salubridad ta revisa sistema formula pa asina sigura cu e ta cumpli cu tur rekisito di nan banda.
E obhetivo principal di e sistema aki di protocol y standard basa ariba higiena y limpieza sanitario ta brinda Aruba e oportunidad pa por tin un destinacion unda nos bishitantenan y hendenan por sinti nan mas sigur. E sistema ta eleva Aruba su aspecto di higiena y limpieza sanitario door di sigui y aplica e conseho di WHO den nos bida diario. Como parti di e “new normal”, bishitantenan sigur lo haci nan escogencia y lo exigi cu un destinacion ta bon prepara. E sistema ta mara na cumplimento di protocolnan pa cual lo otorga un seyo di higiena y limpieza. E seyo aki lo brinda e confiansa y seguridad cual ta loke cada un di nos ta buscando den e momento di incertidumbre aki y lo ta un parti hopi importante pa cu e strategia di comunicacion internacional pa cu Aruba.
A.T.A. na januari ultimo ya caba a lansa su seyo di calidad cu tabata conoci bou di e nomber “Aruba Quality Seal” y subsecuentemente, hopi lihe despues cu Covid-19 a manifesta su mes, a dicidi di cambia e direccion y enfoca principalmente ariba e parti riba higiena y limpieza sanitario. E dicho programa a cuminsa wordo prepara conhuntamente cu un compania conoci di auditoria local cu ta enfoca riba calidad, servicio na cliente, siguridad en general y di cuminda.
Colaboracion, den forma di e comision aki, ta un aspecto cu semper oficina di turismo di Aruba a enfoca riba dje y den e momento aki e ta un parti cardinal pa asina por crea y ehecuta e programa aki. Creando esaki cu e socionan relevante ta brinda oportunidad di crea un sistema integral y holistico cual ta basa ariba informacion completo y pasonan concreto. E comision aki ta consisti di socionan clave manera Ministerio di Salubridad, departamento di salud publico y socionan den turismo manera AHATA, AFBA, ATIA y tambe esnan encarga cu nos “port of entries” cual ta DCA, AAA y APA.
Ya diferente “check-list” y standard ta den proceso di desaroyo y den transcurso di e dianan aki lo wordo revisa y pa asina por cuminsa e aspecto di implementacion y conscientisacion. E diferente areanan cu lo ta enfocando riba dje ta:
a. acomodacion,
b. food & beverage,
c. comercio principalmente e aspecto di ‘retail’
d. proveedor di actividadnan como tambe e. taxi y transporte.
Comunidad di Aruba sigur lo tende mas di e seyo aki den transcurso di simannan nos dilanti, paso e colaboracion di un y tur lo ta esencial pa cu e exito di re-apertura y di e programa aki.
