Durante fin di siman a cuminsa un rumor a aloca un suma di 9 miyon florin den presupuesto pa drecha Arubahuis. Esaki ta despues cu diabierna ultimo a tuma luga reunion pa trata presupuesto di DOW. Durante e reunion aki partidonan MEP y RED a cuestiona algun gasto cu ta ser considera como innecesario un di esaki ta e renobacion di Arubahuis.
Minister President y Minister di Infrastructura ta lamenta e rumor falso aki. E mandatarionan ta bisa cu esaki no ta corecto y cu no tin ningun cen den presupuesto pa renobacion di Arubahuis pa 2020. Ta berdad cu e edificio na Den Haag ta den mal estado y Gobierno tin atencion pa e situacion. Pero mirando cu nos ta den crisis, esaki no por wordo atendi awor. ArubaHuis lo haya su debido atencion na momento cu e situacion financiero di Pais Aruba brinda e espacio necesario.
