Recientemente Excelsior Casino a informa su empleadonan e ciere definitivo di nan operacion. E decision aki ta un muestra di e situacion financiero dificil cu e sector aki ta pasando durante e ultimo añanan y cu a bira mas critico ainda awor cu e crisis di Covid-19.
Pa medio di un carta cu fecha 29 di april ultimo dirigi na su empleadonan, Sr. Alvaro Dos Santo kende ta director di Excelsior Casino a informa cu pa medio di un carta anterior cu fecha 21 di maart ultimo nan a informa tur trahadonan cu debi na e crisis di coronavirus/Covid-19, nan mester a dicidi di manda tur trahado cas a base di ‘no work, no pay.’ Tambe nan a dicidi manda tur trahado cu vakantie obligatorio.
Pero ademas di e crisis di Covid-19, Excelsior Casino a ricibi un carta di Pristine Estates N.V cu ta doño di e localidad unda e casino ta opera caminda nan no ta di acuerdo pa duna exoneracion di pago di huur. Igualmente nan a dicidi di no duna prolongacion di e contract di huur cu a caduca dia 30 di april ultimo. Pristine Estates N.V. a tuma e decision aki debi cu e casino menciona no a cumpli debidamente cu su obligacion financiero di paga nan huurmento.
Ya caba prome cu crisis di Covid-19, Excelsior Casino no tabata genera entrada suficiente pa asina nan por a cumpli cu tur su obligacion financiero, incluyendo pago di huur. Awor cu e crisis actual di e pandemia nan ta lamenta cu e doño di e localidad no kier duna cooperacion. E echo aki y debi na su problema financiero a haci cu e sociedad anonimo di Excelsior Casino mester a bay over pa pidi bancarota. A pesar cu nan a carga speransa cu e situacion di e casino lo por a mehora, pero finalmente no a resta otro opcion cu bati bancarota.
Tur e situacion a genera cu tur trahado lo perde nan trabao. Tambe director di e casino aki a informa e trahadonan cu nan no tin fondo disponibel tampoco pa paga nan dianan di vakantie y tampoco nan añanan di servicio. Nan a a conseha e trahadonan cu na momento cu e procedura di bancarota finalisa, e trahadonan lo por acerca Banco di Seguro Social (SVb) pa haya pago di cesantia.
