Dia di Obrero semper mester trece un reflexion cune. E biaha aki ta rond di e crisis cu Aruba y henter mundo ta pasando aden pa causa di e coronavirus/Covid-19 y su efectonan riba diferente tereno.
Ex sindicalista y Mediador di Gobierno, Anselmo Pontilius, a bisa cu sin duda e virus aki a trece un desgracia pa un gran cantidad di famia di e trahadonan rond mundo, y Aruba no ta un excepcion. E ta un caminda largo cu e clase trahado ta bay confronta pa motibo di un situacion na nivel mundial.
“E ta un dia di labor duro, ya cu na nivel mundial miyones di hende ta sin trabao y lo keda sin trabao pa e proximo lunanan,” el a bisa. Actualmente mundo ta cambiando den totalidad, pero esaki no ta kita afo cu e trahado semper a supera diferente situacion dificil, entre nan momentonan di guera y cualkier otro momento.
El a haci e reflexion su mes cu na momento aki un gran cantidad di trahado no a haya su salario of nan lo keda sin salario. Gobierno a anuncia cu conseho di minister di Reino a aproba un suma pa por subsidia salario. E ta considera cu e sosten aki ta hopi importante pa cualkier grupo di trahado y nan famia cu ta purba di pasa den e momentonan dificil aki di perde trabao.
Den e situacion aki e ta haya cu bo no mester tin berguensa si bo tin cu acepta un trabao cu nunca bo a haci. Ta importante pa acepta cu humildad cualkier tipo di trabao cu lo bira disponibel. “No nenga di haci esaki pasobra na caminda nos tur tin speransa cu e situacion por mehora,” el a declara na Bon Dia Aruba.
Sinembargo cu preocupacion Mediador di Gobierno a bisa cu nos por mira y lo bay sigui mira tin di haci cu empresanan cu ta den caminda pa declara nan mes den bancarota. Aunke -segun Pontilius- e trahadonan por haya un sosten financiero, nunca esaki lo ta igual na bo salario y tampoco igual cu nan entrada, y logicamente e efecto den seno di famia ta enorme.
El a bay na aña 1985 cu tabata un di e momento mas dificil di Aruba su historia. Aunke e tempo aya hopi mas chikito compara cu loke nos ta pasando aden. Pero na aña 85 tambe miles di trahadonan a perde trabao, sin entrada y cu tur e consecuencianan social cu e algo asina ta trece cune.
P’esey ta importante e sosten di tur cu tin un salario pa aporta no solamente pa loke gobierno ta bay pone pa entrega, pero tambe otro forma di solidaridad, ya sea di alimento cu bo por yuda un famia. E ta haya cu e mensahe tambe mester ta cu a pesar di e crisis di coronavirus, cada trahado ariba su mes trata di siña algo nobo. “Trata di no pensa cu mundo a caba sino con bo por yuda bo mes,” el a bisa.
E ta haya cu na Aruba e situacion ta bay tarda, compara cu cualkier otro pais, pa motibo cu nos ta depende substancialmente di turismo. Pero tin otro sectornan por ehempel construccion cu por yuda alivia e parti laboral aki, ya cu otro siman nan lo conoce un apertura.
Mediador di Gobierno ta e departamento cu ta brinda intermediacion pa atende y resolve conflictonan laboral den sector priva.
