Equipo Mericano di salud rumbo pa Aruba atrobe

For di fuente bon informa redaccion di Bon Dia Aruba a haya informacion cu atrobe lo tin un equipo medico for di Merca na caminda pa bin asisti e esfuerzonan local den e lucha contra coronavirus Covid-19. Siman pasa despues di yegada di e equipo medico di 21 persona for di e pais ey, aparentemente riba peticion y cu pago di Hulanda, mester a regresa nan pais ora a surgi problema cu un di e miembronan di e equipo similar cu a yega Curaçao pa igual tipo di asistencia. A resulta cu e persona ey a test positivo pa Covid-19 despues di cual e dicidi di retira ambos equipo completamente. No tabatin mucho claridad duna pa autoridadnan tocante e motibo pa retira henter e equipo na Aruba.

Na e momentonan aki no por a averigua ainda ki dia y ki ora e vuelo lo yega Aruba pero si tn confirmacion di vuelo procedente di Merca planea pa fin di siman aki. Intentonan pa haya un confirmacion di e yegada no a logra cerca e autoridadnan concerni. Tampoco ta conoci si tar trata di e mesun personanan o di otro.

E asistencia Mericano ta parti di e ayudo cu Aruba ta ricibi di parti di Hulanda, cual ta consisti entre otro tambe di e suministro di 12 unidad di ICU cu a yega Aruba caba luna pasa.